د ایران مذهبي مشر علي خامنهیي وايي ایران نیابتي ځواک او جنګي ډلې نه لري
د ایران مذهبي مشر علي خامنهیي د مرغومې په دویمه نېټه د یکشنبې پر ورځ له ترانه ویونکو او شاعرانو سره په یوې ناسته کې د هغو څرګندونو او تحلیلونو په اړه چې ګواکي ایران په سیمه کې خپل نیابتي ځواکونه له لاسه ورکړي وویل: « ایران په سیمه کې هېڅ نیابتي ځواک نه لري.»
هغه په خپلو خبرو کې اشاره وکړه چې حزب الله، حوثیان، حماس او د جهاد اسلامي ډلې د ایران نیابتي ډلې نه دي بلکې د خپلې عقیدې له مخې جګړه کوي.
هغه ویلي دغه جنګي ډلې د دوی استازولي نه کوي او د ایران له لوري ورته هېڅ ډول لارښوونې هم نه کېږي.
خامنه یي په دغه ناسته کې دا هم وویل، که ایران وغواړي چې د جګړې لپاره اقدام وکړي، نو هېڅ ډول نیابتي ځواک ته اړتیا نه لري.
د خامنه یي د څرګندونو برعکس د ادعاوو له مخې ایران د خپلو نیابتي سیاستونو له لارې په منځني ختیځ کې د خپل نفوذ د پراخولو هڅې کوي. د لبنان حزب الله، په عراق کې شیعه ملېشې، په فلسطین کې د حماس او جهاد اسلامي ډلې هغه نیابتي ځواکونه دي چې ویل کېږي د ایران ملاتړ ورسره دی.
په همدې حال کې متحده ایالات، سعودي عربستان، اسراییل او ځینې نور عربي هېوادونه د ایران دغه کړنې د سیمه ییزې بې ثباتۍ او نیابتي جګړو د دوام لوی لامل بولي.
