پخواني ولسمشر حامد کرزي له افغانستان سره د جاپان له تازه بشري مرستې هرکلی کړی
د افغانستان پخواني ولسمشر حامد کرزي پر ایکس پاڼه د جاپان له تازه مرستې هرکلی کړی او دغه هېواد یې د افغانستان یو ښه ملګری بللی دی. کابل کې د جاپان سفارت تېره چارشنبه د ( لیندۍ ۲۸مه) ویلي و، چې له افغانستان سره ۲۷.۵ میلیونه ډالره مرسته کوي.
ښاغلي کرزي په خپله ایکس پاڼه په یوه یادښت کې لیکلي: «جاپان له افغانستان سره ښې اړیکې لري او په بېلابېلو برخو کې یې د افغانانو لاسنېوی کړی دی.»
جاپان ویلي چې دغه اعلان شوې بشري بسپنه به د ملګرو ملتونو او نادولتي موسسو له لارې اړمنو افغانانو ته ورسوي، څو یې په ژوند کې بدلون رامنځته شي.
جاپان پر افغانستان د طالبانو تر واکمنیدو را وروسته له افغانسان سره ۵۰۵ میلیونه امریکایي ډالره مرسته کړې ده.
د جمهوري نظام تر پرځیدو وروسته امریکا هم د درې میلیادره ډالرو مرستې کړې او داسې شکونه شته چې طالبانو د دغو بشري مرستو د ترلاسه کیدو لپاره جعلي نادولتي موسسې هم جوړې کړې او دغه پیسې د مرستو پر ځای تالا ترغه کیږي.
