د بایډن حکومت د عافیې صدیقي د خوشې کیدو په اړه د شهباز شریف لیک ته ځواب نه دی ورکړی
د روان میلادي کال د اکټوبر میاشتې په ۱۷مه نېټه د پاکستان لومړي وزیر په یوه لیک کې د متحده ایالانو له ولسمشر څخه غوښتنه وکړه چې د ترهګرۍ په تور نیول شوې پاکستانۍ عافیه صديقي دې خوشې کړي؛ خو د دوو میاشتو له تیریدو وروسته هم د بایډن حکومت د دغه لیک ځواب نه دی ورکړی.
د پاکستاني رسنیو د راپورونو له مخې د پاکستان د بهرنیو چارو وزارت د اسلام اباد سترې محکمې ته ویلي چې د شهباز شریف د لیک ځواب لا تر اوسه نه دی راغلی.
د یادې محکمې یو قاضي سردار اعجاز اسحاق خان د محکمې په یوې ناسته کې ویلي چې دا د پوښتنې وړ ده چې په واشنګنټن کې د پاکستان سفیر لا تر اوسه د لومړي وزیر د دغه لیک په اړه د متحده ایالاتونو له حکومت سره ډیپلوماتیکه ناسته نه ده کړې.
قاضي اسحاق وویل، چې دا ډول مسایل تل د سفیر له خوا حل کېږي. هغه زیاته کړه چې د هېواد لومړي وزیر لیک استولی؛ خو ځواب یې نه دی ترلاسه شوی چې دا باید څه ډول تعبیر کړو؟
د اسلام اباد سترې محکمې پلاوي د بهرنیو چارو وزارت ته لارښوونه وکړه چې د عافیې د امریکایي وکیل د بیان په اړه یو مفصل راپور وړاندې کړي او دا مسله په ډیپلوماټیکه کچه حل کړي.
د راپورونو له مخې طالبانو هم په قطر کې له امریکایي چارواکو سره په بېلابېلو کتنو کې د عافیې صدیقي د خوشې کیدو غوښتنې کړي دي.
ډاکټر عافیه صدیقي یوه پاکستانۍ ساینس پوهه ده چې د امریکا په یوه پوهنتون کې د عصبي سانیس په برخه کې تر ډوکتورا کچې زده کړې کړې دي. امریکايي ځواکونو نوموړې په ۲۰۰۳ کال کې د ترهګرۍ په تور په کابل کې ونیوله او بیا په ۲۰۱۰ زیږدیز کال کې د امریکا یوې محکمې د ۸۳ کلونو لپاره په بند محکومه کړې ده.
د پاکستان حکومت او بشري سازمانونو په وار، وار هغه بې ګناه ګڼلې او د خوشې کیدو غوښتنه یې کړې.
