حنیف اتمر په جرمني کې د کریسمس په یوه بازار کې د ۶۲ کسانو مرګژوبله ترهګریزه پېښه وبلله
د افغانستان د بهرنیو چارو پخواني وزیر حنیف اتمر په جرمني کې د کریسمس په یوه بازار کې د یوه موټر چلوونکي له لوري ۶۲ کسانو ته د مرګژوبلې اړولو پېښه ترهګریزه وبلله. تېره شپه، جرمني کې یوه موټر چلوونکي د کریسمس په یوه بازار کې ولسي خلک په موټر وهلي.
د افغانستان د بهرنیو چارو پخواني وزیر حنیف اتمر نن شنبه د (مرغومي لومړۍ نیټه) په خپله ایکس پاڼه په یوه یادښت کې لیکلي، چې تېره شپه په جرمني کې د کریسمس په یوه بازار کې د یوه موټر چلوونکي له لوري په موټر د ولسي خلکو لاندې کول او شاوخوا ۶۲ کسانو ته مرګژوبله اړول یوه ترهګریزه پېښه ده.
هغه وړاندې لیکلي چې ترهګریزې کړنې، په نړۍ کې په هیڅ یوه دین کې ځای نه لري، او دی په دې پېښې سخت خواشینی دی.
تېره شپه د جرمني په مګډبورګ ښار کې د کریسمس په یو مارکیټ کې یو موټر چلوونکي د خلکو په ګڼه ګوڼه موټر وربرابر کړ، چې دوه کسان یې ووژل او شاوخوا ۶۰ کسان یې ټپيان کړل.
د دغې پېښې په وژل شویو کې یو ماشوم هم شامل دی او ویل کیږي چې تر لسو د زیاتو ټپیانو روغتیايي حالت نازک دی.
پولیسو ویلي، چې د دغې پېښې په تړاو یې یو عرب وګړی نیولی او په دې اړه نورې پلټنې روانې دي.
د جرمني لومړي وزیر اولاف په ایکس پاڼه د قربانیانو له کورنیو سره خواخوږي ښودلې.
مګډبورګ د برلین سویل لویدیز ته شاوخوا ۱۵۰ کیلومترۍ کې پروت ښار دی.
تر دې مخکې د ۲۰۱۶ کال د ډیسمبر په ۱۹مه د داعش یوه ټونسي غړي د برلین د کریسمس په بازار کې پر خلکو برید کړی و چې ۱۲ کسان په کې وژل شوي وو او ۴۸ نور یې ټپيان شوي وو.
