امریکا د یمن د حوثيانو د توغندیو او قوماندې تاسیسات بمبارد کړل
د امریکا مرکزي قوماندانۍ اعلان وکړ، چې د شنبې په ورځ یې د ایران تر ملاتړ لاندې په صنعا کې د حوثي یاغیانو د توغندیو پر ګودام او قوماندانۍ هوایي بریدونه وکړل.
د سنتکام د بیانیې له مخې، دغه بریدونه د حوثیانو د عملیاتي وړتیاوو د کمولو او ګډوډولو په موخه ترسره شوي دي.
سنتکام د شنبې په ورځ په یوې بیانیه کې اعلان وکړ، دغه عملیات د امریکا د سمندري ځواکونو، جنګي او سوداګریزو بېړیو پر وړاندې په سویلي سره سمندر، بابالمندب او عدن خلیج کې د حوثيانو د بریدونو د مخنیوي په موخه ترسره شوي دي.
دا په داسې حال کې ده، چې څو شېبې مخکې سیمه ییزو رسنیو په صنعا کې د څو پر له پسې بریدونو د ترسره کېدو خبر ورکړ.
د سنتکام په خبره، د عملیاتو په ترڅ کې امریکایي ځواکونو په سور سمندرګي کې څو د یو اړخیزو بریدونو ډرونونه او یو د کروز ضد بېړۍ توغندی له منځه وړی دی.
د متحده ایالاتو مرکزي قومندانۍ بیا د جنګي الوتکو انځورونه هم خپاره کړي دي.
دغه بریدونه په داسې حال کې ترسره کېږي، چې د ایران تر ملاتړ لاندې د یمن حوثیانو په دې وروستیو کې په بالسټیک توغندي سره د اسراییل پلازمېنه تل ابیب په نښه کړ.
د اسراییل دفاعي سیسټم و نه شو کړای د دې توغندي مخه ونیسي، چې د شاوخوا ۱۷ کسانو د ټپي کېدو لامل شو.
