د ازادۍ جبهې په تخار ولایت کې د یوه طالب د وژل کېدو او د ۳ نورو د ټپي کېدو خبر ورکړ

د ازادۍ جبهې د تخار ولایت د تالقانو ښار د لومړۍ امنیتي حوزې په شاوخوا سیمه کې د یوه طالب د وژل کېدو او د ۳ نورو د ټپي کېدو خبر ورکړ. یادې جبهې په خپل اېکس کې ادعا کړې ده، چې یاد شمېر طالبان نن ماښام د دوی د ځواکونو له خوا په نښه شوي دي.

د ازادۍ جبهې په خبره، وژل شوی طالب ملا انور نومېده او د طالبانو مشر و.
طالبانو تر اوسه د دې پېښې په اړه څه نه دي ویلي.
دا په داسې حال کې ده، چې یادې ډلې تېره اونۍ د پنجشنبې په ورځ په کابل او پروان ولایتونو کې هم د یو لړ عملیاتو په ترڅ کې اوه طالبان وژلي او اوه نور یې ټپيان کړي دي.
دغې جبهې تر دې وړاندې په ټول هېواد کې د طالبانو جاسوسانو ته خبرداری ورکړی و، چې له جاسوسۍ او توطیې څخه چې د خلکو د ځورولو او نیولو لامل کېږي لاس واخلي.
د دوی په خبره، تر دې وروسته به د طالبانو ترڅنګ هغه کسان هم په نښه کړي، چې د طالبانو د انساني ضد جرایمو لامل کېږي.
د یادولو ده، چې د روانې میاشتې په پیل کې لانګ وار ژورنال مجلې په خپلې یوې مقاله کې لیکلي و، چې د ازادۍ جبهې سږ کال په ۷۸ عملیاتو کې د څلورو قوماندانانو په ګډون د طالبانو ۲۳۹ غړي وژلي او ۱۴۷ نور یې ټپیان کړي دي.
په دغه راپور کې راغلي، چې د افغانستان د ازادۍ جبهې په لسو ولایتونو کې خپل عملیات پراخ کړي او د طالبانو پر وړاندې د لا وژونکو بریدونو په لټه کې ده.
د ازادۍ جبهې مشر یاسین ضیا دې مجلې ته ویلي، چې دغه جبهه به په ۲۰۲۵ کال کې د طالبانو پر ضد خپل بریدونه زیات کړي.
سره له دې چې په افغانستان کې د بېلابېلو ترهګرو ډلو د ځای پر ځای کېدو ادعاوې کېږي او له دې وضعیت څخه د سیمې د هېوادونو په ګډون د نړۍ یو شمېر هېوادونه اندېښمن شوي دي، خو طالبان وایي، چې دوی د افغانستان په خاوره کې هېڅ یوې ترهګرې ډلې ته ځای نه دی ورکړی او نه هم له دې هېواد څخه نورو هېوادونو ته کوم ګواښ پېښېږي.