پر کییف د روسیې توغندیز برید یو تن وژلی او اوه نور یې ټپیان کړي دي
د اوکراین په پلازمېنه کییف ښار د روسیې په توغنديز برید کې یو کس وژل شوی او اوه نور ټپیان شوي. دغه برید چې د جمعې په ورځ ترسره شو، په ګڼو ودانیو کې اور ولګېد او ګڼو اداري دفترونو ته یې زیانونه واړول.
د کییف د پوځي ادارې مشر سرګي پاپکو د جمعې په ورځ د (لیندۍ په ۳۰مه) وویل چې روسي ځواکونو په دې برید کې اته توغندي کارولي چې په کې «کینژال» هایپرسونیک توغندي او «کېاین ۲۳» بالستیک توغندي شامل دي.
د کییف ښاروال رویټرز ته وویل چې په دغه برید کې لږ تر لږه اووه کسان ټپیان شوي چې څلور یې د درملنې لپاره روغتون ته وړل شوي دي.
ځايي چارواکو او د اوکراين هوايي ځواک ویلي، چې د دغه هېواد هوايي دفاعي سيستم د توغنديو بريد ته ځواب ورکړی دی.
همداشان عیني شاهدانو رویټرز ته ویلي چې د اوکراین د هوايي ځواکونو له خبرتیا وروسته د کییف په بیلابېلو سیمو کې د څو چاودنو غږونه اوریدل شوي دي.
دغه برید په داسې حال کې شوی چې د روسیې او اوکراین ترمنځ کړکېچ دوام لري او کییف په وار، وار د روسیې د هوايي بریدونو د زیاتوالي په اړه خبرداری ورکړی دی.
