کابل او پروان کې د څو چاودنو غږونه اورېدل شوي

په کابل او پروان کې سیمه ییزو سرچینو افغانستان انټرنشنل سره په خبرو کې د څو چاودنو خبر ورکړ. سرچينو زياته کړې، چې دغه چاودنې د پروان ولايت بګرام هوايي ډګر ته څېرمه، جبل السراج ولسوالۍ او د کابل ښار د شپږمې امنيتي حوزې په مربوطاتو کې شوې دي.

د دغو راپورونو له مخې، لومړۍ چاودنه نن مازدیګر شاوخوا ۴ بجې د پروان ولایت په جبل السراج سیمه کې شوې ده. بیا پنځه بجې د بګرام هوايي ډګر ته څېرمه یوه بله چاودنه وشوه.

درېیمه چاودنه نن مازدیګر شاوخوا ۵:۵۰ دقیقې د کابل ښار د شپږمې امنیتي حوزې په مربوطاتو کې شوې ده.

تر اوسه د چاودنو د نوعیت او د احتمالي مرګ ژوبلې په اړه څه نه دي ویل شوي او طالبانو هم په دې اړه څه نه دي ویلي.