په خیبر پښتونخوا کې د یوې چاودنې له امله درې تنه پاکستاني پوځیان وژل شوي دي
دغه چاودنه د سې شنبې په ورځ د خیبر پښتونخوا د ډېره اسماعیل خان په دارابان سیمه کې د امنیتي ځواکونو پر یو موټر شوې ده.
ځینو پاکستاني رسنیو ویلي، چې په دغې پېښه کې دوه تنه نور پوځیان ټپي شوي هم دي.
که څه هم چې تر دې مهاله د پاکستان پوځ په دې اړه څه نه دي ویلي؛ خو د خیبر پښتونخوا والي کریم کونډي د دغې پېښې غندنه کړې او په سیمه کې یې روان امنیتي وضعیت د «اندېښنې وړ» بللی دی.
تر دې وړاندې د سې شنبې په سهار د (لیندۍ ۲۷مه) د خیبر پښتونخوا په شانګله کې دوه پولیس د پلټنې په یوې پوسته کې د ناپیژانده وسلهوالو لهخوا وژل شوي وو.
په دې وروستیو کې د خیبر پښتونخوا او بلوچستان صوبو کې د تاوتریخوالي پېښې زیاتې شوې، چې له امله یې د پاکستان امنیتي ځواکونو ته په کې درنه مرګ ژوبله هم اوړي.
څه موده وړاندې ګڼو سیاسي ګوندونو د خیبر پښتونخوا له ایالتي چارواکو سره ناسته لرله چې په هغې کې د روان امنیتي وضعیت په اړه اندېښنې په ډاګه شوې وې.
دغو ګوندونو ویلي و، چې د خیبر پښتونخوا په نیمایي برخو د مخالفو وسلهوالو ډلو راج چلیږي او ورسره امنیتي حالت د هرې ورځې په تېریدو سره د خرابېدو پر لور روان دی.
