په سوریه کې د شپې کلبونه بیا پرانیستل شول
د فرانسې خبري اژانس په یوه راپور کې ویلي، چې په سوریه کې د شپې کلبونه بېرته پرانیستل شوي. په دمشق کې د بشارالاسد له نسکورېدو او مخالفې ډلې له واکمنېدو وروسته، مېکدې او د شپې کلبونه څلور ورځې تړل شوي وو، خو په دې موده کې د دوی پر ضد کوم ځپونکي ګامونه نه دي اخیستل شوي.
د دغه راپور له مخې، په سوریه کې نوی حکومت به په دغه هیواد کې د ټولو ټولنیزو او مذهبي ډلو زغم ولري.
د تحریر الشام یوه چارواکي د نوم نه ښودلو په شرط (ای اېف پي) ته وویل، «د شرابو د منع کولو په اړه خبرې سمې نه دي. زموږ لپاره تر دې لویې مسلې شته چې حل یې کړو.»
سوریه د مسیحیانو لوی اقلیت لري چې کرېسمس نمانځي، او په دمشق کې د دې مراسمو لپاره چمتوالي او سینګارونه مخ په زیاتیدو دي.
