د افغانستان کرېکټ ملي لوبډله نن د زېمبابوې په وړاندې لوبیږي
افغان کرېکټ ملي لوبډله نن جمعه د (ليندۍ ۲۳مه) مازدیګر څلور بجې د زېمبابوې پر وړاندې د دوه اړخېزو ۲۰ اوره سیالیو دویمه لوبه ترسره کوي. افغان کرېکټ بورډ وايي، چې دغه لوبه د زېمبابوې په پلازمېنه هرارې کې ترسره کېږي.
دغه لوبلړۍ د چهارشنبې په ورځ د زېمبابوې په کوربه توب پيل شوه، چې د زېمبابوې کرېکټ لوبډلې د درېيو شل اوره لوبو په لومړۍ سیالۍ کې افغانستان ته د څلورو ويکټو په توپير ماتې ورکړې وه.
د افغانستان او زېمبابوې کرېکټ لوبډلو ترمنځ د درېیو شل اوره لوبو د لومړۍ سيالۍ پچه افغان لوبډلې ګټلې وه او لومړۍ يې د توپوهنې پرېکړه کړې وه.
افغان ملي لوبډلې په شل اورونو کې د خپلو شپږو لوبغاړو په سوځېدو د زېمبابوې کرېکټ لوبډلې ته ۱۴۵ منډې هدف ورکړی و.
افغان لوبډلې په توپوهنه کې کريم جنت ۵۴ او محمد نبي ۴۴ منډې وکړې. زېمبابوې لوبډلې په شل اورونو کې د خپلو شپږو لوبغاړو په سوځېدو دغه هدف پوره کړ.
د زېمبابوې پيليز توپ وهوونکي برېن بونوت په ۴۹ توپونو ۴۹ منډې جوړې کړې وې.
د زېمبابوې او افغانستان کرېکټ بورډ د ۲۰۲۴ په اکټوبر میاشت کې ویلي وو، چې دواړو هیوادونو د کرېکټ د ۲۰ او ۵۰ اوریزو او ټېسټ لوبو په ګډون په ټولو فارمټونو کې د دوه اړخېزو سیالیو د ترسره کېدو هوکړه کړې.
