افغان فوټبال لیګ کې ابومسلم، خدیم ته ماتې ور کړه، عدالت او سرسبز یاشلر لوبه سره مساوي کړه

د افغانستان فوټبال فدراسيون له لوري د اتلانو لیګ د څلورم پړاو سيالیو پر مهال د شنبې په ورځ لومړۍ لوبه کې د فراه ابومسلم لوبډلې سرپل خدیم اف سي ته درې پر يو ماتې ورکړه. د سياليو دويمه لوبه د فراه عدالت او فاریاب سرسبزیاشلر لوبډلو ترمنځ ۲ پر ۲ مساوي پای ته ورسېده.

د فراه ابومسلم لوبډله، چې تر ډېره د سياليو د قهرمانۍ هڅه کوي په خپل ترکيب کې د افغانستان د ملي لوبډلې د لوبغاړو ترڅنګ بهرني لوبغاړي هم له ځان سره لري.

دغې لوبډلې په بريا د سياليو پيل وکړ او په خپله لومړۍ لوبه کې يې درې امتيازونه تر لاسه کړل.

د فراه ابومسلم لوبډله کې افریقايي لوبغاړي ایمانويل یاغر، لوبډلمشر امان الله سرداري او جبار شيرزي ګولونه وکړل.

د همدې سياليو د شنبې د ورځي دويمه لوبه د فراه عدالت او فاریاب سرسبز یاشلر لوبډلو ترمنځ ۲ پر ۲ مساوي پای ته ورسېده.

په همدې سيالۍ سره دواړو لوبډلو یو یو امتياز تر لاسه کړ.

د افغانستان د فوټبال اتلانو لیګ څلورم پړاو سيالۍ د جمعې په ورځ په هرات ولایت کې د ۱۲ لوبډلو ترمنځ پیل شوې.