د طالبانو امربالمعروف مرستیال: موږ یوازنی اسلامي نظام یو چې ټوله اسلامي نړۍ را باندې ویاړي
د طالبانو امربالمعروف وزارت پوځي مرستيال د بریتانیا د ديني عالمانو د لس کسيزه پلاوي سره د ليدني پرمهال ویلي، «اسلامي امارت یوازنی اسلامي نظام دی چې ټوله اسلامي نړۍ پرې ویاړي.»
د طالبانو امربالمعروف وزارت د شنبې په ورځ په يوې اعلاميه کې د دوی د پوځي مرستيال سعيد احمد شهيد خېل او د بريتانيا څخه د دیني عالمانو د لس کسيزې ډلې د ليدنې خبر وکری.
د طالبانو د دغه وزارت پوځي مرستيال له راغلو ديني عالمانو غوښتي، چې د دوی رښتنی انځور او ديني واقعیتونه نړۍ ته وښیي.
په اعلاميه کې د بريتانيا د ديني عالمانو له قوله لیکل شوي، چې «اسلامي امت د امارت په راتګ» خوښ او ډاډه دي.
دوی لیکلي: « له ډېرو کلونو راهیسې مسلمانانو داسې انګېرله، چې اسلامي امت یتیم دی، خو د اسلامي امارت پر راتګ موږ ډاډ ترلاسه کړ چې اسلامي امت اوس غمخواره لري او پرې ډاډه دي.»
تر اوسه د بريتانيا ديني عالمانو په د دې ليدنې په اړه څه نه دي ویلي.
د اسلامي هېوادونو ترڅنګ د نړۍ هيڅ هېواد طالبان په رسميت نه دي پېژندلي.
ډېرو اسلامي هېوادونو د بشري حقونو اړوند د طالبانو پر سرغړونو نيوکې کړي او له دغه ډلې يې غوښتي، چې له خلکو سره د توند چلند څخه لاس واخلي.
