د طالبانو ځینې مخالفو مشرانو سیاسي ټلواله جوړه کړه
د طالبانو ځینې مخالفو مشرانو د «افغانستان د ژغورنې ملي اجماع» په نوم سیاسي ایتلاف جوړ کړ. مارشال دوستم، احمد مسعود، کریم خلیلي، عمر داوودزی، رحمت الله نبیل، محقق، رسول سیاف، اسماعیل خان، تادین خان، صادق مدبر، صلاح الدین رباني او عطا محمد نور د دغه ایتلاف مهمې څېرې دي.
یونس قانوني، راحله دوستم، سرور دانش، شاه جهان او عبدالحق شفق د دې اتحاد نور غړي دي.
«د افغانستان د ژغورنې ملي اجماع» د جمعې په ورځ په یوه مجازي غونډه کې د دغه ایتلاف د غړو په شتون سره خپل موجودیت اعلان کړ.
د ۱۴۰۰ کال د زمري په میاشت کې واک ته د طالبانو له بیا راستنیدو وروسته، څو نظامي جبهې او د طالبانو ضد سیاسي جریانونه جوړ شول.
په افغانستان کې دننه او بهر سیاسي ډلو په وار وار له طالبانو غوښتي، چې د افغانانو خپلمنځي خبرې پیل کړي؛ خو طالبانو دا غوښتنې رد کړې دي.
