سرچینې: طالبانو د کابل په "شنه زون" کې په مسافرخونو کې د شپې پر پاتې کېدو بندیز لګولی دی

ځايي سرچينې وايي، چې د طالبانو استخباراتو د کابل "شنه زون" ته څېرمه په هوټلونو او مسافر خونو کې د شپې پاتې کېدل منع کړي دي. د سرچينې د معلوماتو له مخې، د طالبانو استخباراتو ویلي، چې دغه بنديز يې د امنيتي دلايلو له امله لګولی دى.

د سیمه ییزو سرچینو په وینا، د طالبانو استخباراتو د دې بندیز د لاملونو په اړه توضیحات نه دي ورکړي.

د بلال سروري په نوم یو خبریال هم پر اېکس پاڼې د کابل په شنه سیمه کې د بندیز په اړه لیکلي دي.

په هغه عکس کې چې هغه پر اېکس پاڼې خپور کړی، لیدل کیږي چې د مسافرخونو د دهلیز پر یو دیوال لیکل شوي دي: «د امنیتي لاملونو له امله، میلمانه نه شي کولی په خونه کې شپه تېره کړي.»

مخکې له دې چې طالبان پر افغانستان بیا واکمن شي، د امريکا په ګډون د بهرنيو هېوادونو سفارتونه او د نړۍوالو بنسټونو او موسسو دفترونه د کابل په شنه زون کې وو. په دې سیمه کې ولسمشرۍ ماڼۍ، د دفاع، کورنیو چارو او بهرنیو چارو وزارتونه هم موقعیت لري.