سرچینې: سوېلي وزیرستان کې د کور د چت غورځېدو په پېښه کې یو پلار او دوه زامن مړه شوي

له سوېلې وزیرستانه سرچینو افغانستان انټرنشنل پښتو ته ویلي، چې تېره شپه د سره راغه په سیمه کې د یوه کور د چت غورځېدو له امله یو پلار او دوه زامن یې مړه شوي. ویل کیږي، په پېښه کې مړه شوي ماشومان د پنځو او اوو کلونو په عمر وو.

له سوېلې وزیرستان څخه سرچینو افغانستان انټرنشنل پښتو ته نن پنجشنبه د (لیندۍ ۱۵مه) ویلي، چې تېره شپه د سوېلې وزیرستان د سره راغه په سیمه کې د یوه کور د چت غورځېدو له امله یو پلار او دوه زامن یې مړه شوي.
د کور د چت پرې وتو لامل د کور زوړالی ښودل شوی دی.
په مړو شویو کسانو کې د کور څښتن عرفان نومی چې په یوه شخصي درملتون کې یې کار کاوه او د هغه دوه ماشومان شامل دي.
د روانې اونۍ په سر کې د خیبرپښتونخوا په خیبر او سوېلي وزیرستان ولسوالیو کې د کورونو د چت پرېوتو په دوو جلا پېښو کې اته تنه مړه او اته نور ټپیان شوي وو.