پښتین: افغانان د تحریک انصاف د احتجاج پرمهال نه، بلکې له عام بازار او شاوخوا سيمو نيول شوي

د پښتون ژغورنې غورځنګ مشر منظور پښتین وایي، په اصل کې په اسلام اباد کې افغانان د تحریک انصاف د احتجاج پر مهال نه؛ بلکې له عام بازار او شاوخوا سيمو څخه نيول شوي دي.

هغه پر اېکس پاڼه لیکلي، چې دغه نیول شوي افغانان ګواښل کېږي او له دې لارې ترې ویډیويي بیانونه اخیستل کېږي.
هغه زیاته کړې ده:« دغه افغانان ګواښل کېږي، که یې بیان ورکړ؛ نو ژر تر ژره به خوشې شي که نه په یو درواغجنې قضیه کې به یې ونیسي او زندان ته به یې واچوي.»
نوموړي ادعا کړې، چې د پاکستان حکومت د تحریک انصاف ګوند د احتجاج غلط ثابتولو لپاره په عامو پښتنو کې د ظلم او جبر سره خپلې دروغجنې دعوې ثابتوي.
هغه وړاندې لیکلي، چې مرکزي حکومت په ښکاره د قومي کرکې پر بنسټ په پښتنو ظلم کوي.
تر دې وړاندې (د لېندۍ په ۹مه) د پاکستان د بهرنیو چارو وزارت ویاندې ممتاز زهرا بلوڅ ویلي و، چې په اسلام اباد کې د عمران خان د پلویانو په لاریون کې افغان وګړي نیول شوي دي.
اغلې بلوڅ ویلي و، چې د نیول شویو کسانو شمېر او هویت به ډېر ژر د دغه هېواد د کورنیو چارو وزارت له‌خوا اعلان شي.
خو تر دې وړاندې د پاکستان د کورنیو چارو وزیر محسن نقوي ادعا کړې وه، چې د تحریک انصاف په لاریون کې افغانان هم شامل وو او ۱۲۰ تنه یې نیولي دي؛ خو د تحریک انصاف چارواکو دغه ادعا رد کړه، چې ګواکې په لاریون کې افغانانو کډون درلود.