هبت الله د کابل چارواکي د طبي زده کړو د فرمان د وضاحت او ملاتړ لپاره کندهار ته غوښتي
د طالبانو تر کنټرول لاندې د یو سکتوري وزارت مرستیال افغانستان انټرنشنل - پښتو ته ویلي چې د طالبانو مشر د ریاست الوزرا مرستیالان او وزیران د زده کړو په تړاو د خپلې وروستۍ پرېکړې د ملاتړ او وضاحت لپاره کندهار ته غوښتي.
سرچینه زیاتوي، ملا برادر د ملا هبت الله د وروستي فرمان په اړه نارضایتي ښودلې.
دغې سرچینې د نوم د نه ښودلو په شرط ویلي چې د طبي انسټیټیوټونو په تړاو د ملا هبت الله وروستۍ پرېکړې په کابل کې د وزیرانو او طالب مشرانو تر منځ موافق او مخالف نظرونه راپارولي دي، چې له امله یې نوموړی غواړي خپلو وزیرانو او چارواکو ته د دغې پرېکړې په اړه وضاحت ورکړي او د هغوی ملاتړ تر لاسه کړي.
د طالبانو باخبرې سرچینې وايي چې د ملا هبت الله وروستۍ پرېکړه په کابل کې د دغې ډلې د وزیرانو لپاره حیرانوونکې وه.
سرچینه زیاتوي، چې ملا برادر خپله نارضایتي د طالبانو له مشر سره شریکه کړې او هغه پرېکړه کړې، چې ښايي په دې غونډه کې ګډون ونه کړي.
یاده سرچینه وايي، چې په دې غونډه کې به د سراج الدین حقاني په ګډون د امنیتي ادارو مشران، د لوړو زده کړو او پوهنې وزیران او ګڼ نور د سکتوري وزارتونو مشران برخه واخلي.
د سرچینې په خبره چې ملا یعقوب دا مهال کندهار ته رسېدلی او ټاکل شوې د سراج الدین حقاني، د استخباراتو رییس، د چارو ادارې مشر، عبدالحکیم حقاني او یو شمېر نور وزیران به سبا کندهار ته لاړ شي.
یاده سرچینه زیاتوي چې د عامې روغتیا د وزیر په ګډون یوه کوچنۍ ډله وزیران د ځمکې له لارې له کابل څخه کندهار ته نن ماښام روان شوي دي.
د اریانا - افغان هوايي شرکت یوې سرچینې افغانستان انټرنشنل - پښتو ته ویلي، چې د کانونو د وزیر هدایت الله بدري په ګډون یو شمېر وزیران سبا سهار نهه بجې د اریانا - افغان هوايي شرکت په الوتکه کې د کندهار په طرف الوتنه لري.
د کابل هوايي ډګر یوې سرچینې ویلي چې د طالبانو د چارو ادارې له خوا ورته ویل شوي، چې سبا نهه بجې یو شمېر وزیران پر وي ای پي لار کندهار ته الوتنه لري.
یوې بلې سرچینې افغانستان انټرنشنل ـ پښتو ته وویل چې ملا هبت الله د طبي زده کړو په تړاو له پرېکړې وړاندې د لوړو زده کړو او پوهنې له وزیرانو سره مشوره کړې وه.
تازه ملا هبت الله په خپل یو فرمان کې په افغانستان کې د نجونو په نیمه عالي طبي زده کړو هم بندیز ولګاوه، چې دې پرېکړې په کور دننه او بېرون ګڼ غبرګونونه راپارولي دي.
