د خیبرپښتونخوا په خیبر او سوېلي وزیرستان کې د چت پرېوتو په دوو پېښو کې اته تنه مړه شوي
د پاکستاني رسنیو د راپورونو له مخې، د خیبرپښتونخوا په خیبر او سوېلي وزیرستان ولسوالیو کې د خونې د چت پرېوتو په دوو جلا پېښو کې اته تنه مړه شوي او اته نور ټپیان شوي دي.
د رسنیو د معلوماتو له مخې تېره شپه د خیبرپښتونخوا ایالت د خیبر ولسوالۍ په الاچه سیمه کې د یوې خونې د چت لوېدو په پېښه کې د یوې کورنۍ ۱۳ غړو ته مرګ ژوبله اوښتې ده.
د دغه خبر له مخې، د خیبر ولسوالۍ په لرې پرته لاچه سیمه کې د چت لوېدو په پېښه کې د یوې کورنۍ پنځه غړي مړه شوي دي.
د چت راپرېوتو په پېښه کې په مړو شویو کسانو کې، د کورنۍ مشر، د هغه مېرمن، د ده اینګور او لمسیان شامل دي.
د خبر له مخې د خونې د چت پرېوتو په دغه پېښه کې د یادې کورنۍ د اته تنو د ټپي کېدو راپور هم ورکړل شوی او ویل شوي، چې په پېښه کې ټپي شوي کسان د درملنې په موخه د پېښور مرکزي روغتون ته لېږدول شوي دي.
د یو بل خبر له مخې، د سوېلي وزیرستان په سره روغه سېمه کې هم د یوه کور د خونې چت راپرېوتی دی.
د معلوماتو له مخې، په یاده پېښه کې هم د یوې کورنۍ درې تنه مړه شوي دي.
په دغه پېښه کې پلار ، زوی او لور مړه شوي دي.
په دغو دواړو پېښو کې د چت غورځېدو لامل خټین او زاړه کورونه ښودل شوي دي.
