ګاونډیان: په افغانستان کې باید د ټولو قومونو د ګټو استازی حکومت جوړ شي
د ډله ییز امنیت تړون سازمان په استانه کې د غړو هېوادونو د غونډې له ختمېدو وروسته په افغانستان کې د یوه ټول شموله حکومت پر جوړېدو ټینګار وکړ. دغه سازمان ویلي، چې د یوه باثباته افغانستان د تامین لپاره د ټولو قومونو په شتون د یوه ټول شموله حکومت جوړول یو مهم عامل دی.
د ډله ییز امنیت تړون سازمان امنیت شورا ټینګار وکړ چې «موږ د یوه سوله ییز، خپلواک، متحد افغانستان غوښتونکي یو چې له جګړې، ترهګرۍ او نشه یي توکو څخه پاک وي.»
د یاد سازمان امنيت شورا له نړيوالې ټولنې وغوښتل، چې له افغانستان سره د بشري مرستو اندازه زياته کړي، څو له خلکو سره مرسته وشي او د دغه هېواد بنسټيز تاسيسات پراختیا ومومي.
په اعلامیه کې د ملګرو ملتونو تر څارنې لاندې د افغانستان د شخړې د هواري لپاره څو اړخیز پلاتفورمونو ته په اشارې لیکل شوي، «موږ باور لرو چې د اقتصادي اړیکو پراختیا او په سیمه ییزو اقتصادي سیسټمونو کې د افغانستان ادغام به د سولې او ثبات له ټینګښت سره مرسته وکړي.»
په ورته وخت کې دې شورا ټینګار کړی، چې له ترهګرۍ سره د مبارزې په برخه کې دوه ګوني معیارونه د منلو وړ نه دي او ترهګري په هیڅ صورت د توجیه وړ نه ده.
د دفاع وزیرانو، د امنیت شورا سرمنشيانو او د ډله ییز امنیت تړون سازمان د بهرنیو چارو وزیرانو دغه غونډه د پنجشنبې په ورځ په استانه ښار کې جوړه شوه.
افغانستان د ګاونډیانو لپاره د ګواښ سرچینه ده
په یوه جلا اعلامیه کې، چې د ډله ییز امنیت تړون سازمان د غړو هېوادونو د بهرنیو چارو وزیرانو له خوا خپره شوې، د افغانستان د موضوع په اړه د سیمه ییزو همکاریو پر پیاوړتیا ټینګار شوی دی.
د روسیې د بهرنیو چارو وزارت په ویب پاڼه کې په خپره شوې اعلامیه کې راغلي:«موږ ټینګار کوو چې په سیمه کې زموږ ګډې ګټې په افغانستان کې د سولې او ثبات ټینګښت، د افغانستان له خاورې د رامنځته شوي تروریزم، افراطیت او مخدره موادو له ګواښونو سره مبارزه ده. »
د ډله يیز امنيت تړون سازمان د غړو هېوادونو د بهرنيو چارو وزيرانو په اعلاميه کې د امنيتي وضعيت په اړه اندېښنه څرګنده شوې ده.
دوی ویلي، چې: « په افغانستان کې میشتې ترهګرې ډلې د ډله ییز امنیت تړون د غړو هیوادونو امنیت ته جدي ګواښ دي.»
د بهرنیو چارو وزیرانو په افغانستان کې د یوه ټول شموله حکومت د جوړولو اهمیت ته هم اشاره کړې او ويلي يې دي، چې په افغانستان کې باید داسې حکومت جوړ شي، چې د ټولو قومونو د ګټو استازیتوب وکړي او کار او د نجونو د زده کړو ته د لاس رسي په ګډون د ښځو او نجونو د اساسي بشري حقونو او ازادیو د تامین په برخه کې خپل مکلفیتونه پوره کړي.
د سازمان د غړو هیوادونو د بهرنیو چارو وزیرانو «په افغانستان کې د قومي او مذهبي دلایلو له امله د روانو ځورونو په اړه» اندیښنه څرګنده کړې ده.
دوی دا هم ویلي دي، چې د ډله ییز امنیت تړون سازمان غړي هېوادونه په ګاونډ کې د افغانستان په ولایتونو کې د ګواښونو له زياتېدو اندېښمن دي.
په اعلامیه کې راغلي چې «موږ د ډله ییز امنیت تړون سازمان د بهرنیو چارو د وزیرانو په شورا کې د افغانستان د کاري ډلې په چوکاټ کې د افغانستان په اړه خبرو ته ادامه ورکوو.»
د ډله ييز امنیت تړون سازمان د بهرنیو چارو وزیرانو د افغانستان په شاوخوا کې د امنیتي کمربند د جوړولو په اړه د تاجکستان د جمهور رییس امام علي رحمان غوښتنې ته په اشارې سره وویل: «موږ د سیمې د امنیت د ټینګښت او د افغانستان د خلکو د ملاتړ لپاره د ګډو اقداماتو د دوام په تړاو خپل چمتووالی تاییدوو.»
