پاکستانی جنرال: د افغانستان او پاکستان ترمنځ د کرښې د امنیت لپاره به ټولې وسیلې وکاروو
د پاکستان دولتي ټلویزیون د پنجشنبې په ورځ د (لېندۍ ۸مه) د چمن د قبایلي مشرانو، دیني عالمانو، ځوانانو او پاکستاني پوځیانو د یوې ګډې غونډې ویډیو خپره کړې او ویلي یې دي، چې تېره ورځ په چمن کې امن جرګه ترسره شوه.
پاکستان د دولتي ټلویزیون د راپور له مخې، په دغې جرګه کې د ډیورنډ پر کرښه د مدیریت او امنیتي وضعیت په اړه خبرې اترې شوې دي.
په دغه جرګه کې په بلوچستان کې د پاکستان د پوځ یو لوړپوړي جنرال عابد مظهر ویلي، چې « په سیمه کې د امنیت د ټینګښت او د پاکستان او افغانستان تر منځ د پولې د ساتنې لپاره ټولې وسیلې په کار اچوي.»
د راپور له مخې په یاده جرګه کې د سوېلي پښتونخوا د چمن قومي مشرانو ویلي، چې د ډیورنډ په فرضي کرښه د ترهګرۍ د پای ته رسولو په کار کې د پاکستان د پوځ تر شا ولاړ دي او ملاتړ یې کوي.
بل خوا د سپین بولدک ـ چمن پر دروازه د پاسپورټ او ویزې د جبري کېدو په غبرګون څه د پاسه له یوه کال راهیسې پرلت وهل شوی.
د دغه پرلت غړو د چمن د قبایلي مشرانو او پاکستاني پوځیانو تر منځ د ناستې په اړه سخت غبرګون ښودلی دی.
د دغه پرلت غړي وايي، د قومي مشرانو په نوم ځیني کسان د پاکستاني پوځ لاس پوڅي دي او د خپلو شخصي ګتو لپاره د امن په نوم په مصنوعي جرګو کې ګډون کوي.
پرلتوال وايي، د پاکستاني پوځیانو، حکومت او یو شمېر مشخصو کسانو ترمنځ پر دغه ډول جرګو او ناستو د چمن د خلکو ستونزې نه هوارېږي.
