په کورمې ولسوالۍ کې د اوربند سره، سره لا هم د دواړو مخالفو غاړو لهخوا نښتې روانې دي
د خیبر پښتونخوا د کورمې ولسوالۍ امنیتي چارواکي په دغه ولسوالۍ کې د مساپرو پر موټر د برید له پېښې وروسته تر دې مهاله د واړو لوریو په نښتو کې د وژل شویو کسانو شمېر ۱۰۲ تنو ته رسېدلی دی.
د کورمې ولسوالۍ پولیسو خبریالانو ته ویلي، چې لا هم دغلته امنیتي وضعیت نه دی کابو شوی او د سوني او شیعه مذهبو ترمنځ نښتې روانې دي.
په کورمه کې د روغتون سرچینو ویلي، چې په د شیعه مساپرو پر موټریز کاروان د برید په پېښه کې د وژل شویو کسانو شمېر نن چهار شنبه ۵۲ ته لوړ شو.
د روغتون مسوولینو ویلي، چې د کورمې د بېلابېلو سیمو څخه د تازه پېښو په پایله کې روغتون ته د دوو کسانو مړي او شپږ تنه په ټپي حالت کې وروړل شوي دي.
بل خوا د کورمې ولسوالۍ د پولیسو مسوولین وايي، د يادې ولسوالۍ په بېلابېلو سيمو کې د شیعه او سوني مذهبو ترمنځ په روانو نښتو کې ټولټال ۱۰۲ تنه وژل شوي او ۱۳۸ تنه ټپيان شوي دي.
همدارنګه له پاړه چنار څخه سرچینې وايي، چې په کورمه کې د تېرو څو ورځو راهیسې انټرنیټي خدمتونه بند شوي او هلته ټولې تعلیمي ادارې هم تړل شوې دي.
د کورمې ولسوالۍ امنیتي چارواکي همداراز زیاتوي، چې پر ډیورنډ کرښه له افغانستان سره د خرلڅۍ پر لاره هم هر ډول سوداګریز تګ راتګ بند شوی دی.
د کورمې ولسوالۍ د پولیسو مشر جاوید الله محسود وايي، چې په کورمه کې د امنیت د ډاډمنتیا لپاره هڅي دوام لري.
د نوموړي په خبره، په کورمه کې د وضعیت د کابو کولو لپاره د امن جرګې لپاره قومي مشران سیمې ته رسېدلي دي.
کورمه یوه له هغو سیمو څخه ده، چې ډېری وخت په کې فرقهییزې شخړې رامنځ ته کېږي.
تېره میاشت په کورمه کې په یوه نښته کې د درېیو ښځو او دوو ماشومانو په ګډون لږ تر لږه ۱۶ کسان ووژل شول.
دغه راز د جولای او سپټمبر په میاشتو کې هم د مذهبي نښتو له امله لسګونه کسان وژل شوي وو.
د پاکستان د بشري حقونو خپلواک کمیسون پر پاکستاني چارواکو غږ کړی، چې په سیمه کې د "خطرناکو شخړو تکرار" ته "عاجله پاملرنه" وکړي.
دغه کمېسیون د پاکستان حکومت ته په دې سیمه کې د «بشري ناورین» په اړه خبرداری هم ورکړی دی.
