د شخړو او امنیتي مطالعاتو انستیتوت وایي، روانه میاشت ۵۵ تنه پاکستاني ځواکونه وژل شوي دي
د شخړو او امنیتي مطالعاتو انستیتوت نومبر میاشت د پاکستان امنیتي ځواکونو ته تر ټولو خونړۍ میاشت بللې او ویلي یې دي، سره له دې چې د روانې میاشتې پای ته شاوخوا یوه اونۍ پاتې ده؛ خو بیا هم د دغه هېواد ۵۵ امنیتي ځواکونه وژل شوي دي.
خو د پاکستان مخالفې وسلهوالې ډلې بیا وایي، چې د دغو ځواکونو د وژلو شمېرې تر هغې څو برابره زیاتې دي چې حکومتي سرچېنې یې له رسنیو سره شریکوي.
په اسلام اباد کې د شخړو او امنیتي مطالعاتو انستیوت په خپل راپور کې چې د پنجشنبې په ورځ د (لیندۍ په لومړۍ نېټه) یې خپور کړی ویلي، چې په همدغه موده کې د وسلهوالو ډلو ۶۳ تنه هم وژل شوي دي.
په راپور کې ویل شوي، چې تېره میاشت په همدومره موده کې ۳۰ تنه امنیتي ځواکونه د وسلهوالو ډلو سره په نښتو کې وژل شوي وو چې دغه نوې شمېرو کې نږدې دوه برابره زیاتوالی راغلی.
په راپور کې زیاته شوې، چې د روان کال په تېرو لسو میاشتو کې د مخالفو وسلهوالو ډلو لهخوا د پاکستان پر امنیتي ځواکونو ۷۸۵ بریدونه شوي چې له امله یې ۹۵۱ تنه وژل شوي او ۹۶۶ نور ټپیان شوي دي.
له هغه مهاله چې په افغانستان کې طالبانو واک تر لاسه کړی، پر پاکستاني پوځیانو د وسلهوالو ډلو بریدونو زور اخیستی، چې سږنی کال په دغه اخ و ډب کې پام وړ زیاتوالی لیدل کېږي.
پاکستاني چارواکي د دغو وسلهوالو بریدونو پړه پر ټيټيپي ډلې اچوي او وایي، چې د دغې ډلې وسلهوال په افغانستان کې دېره دي او له هماغه ځایه د دوی پر ځواکونو د بریدونو پلانونه جوړوي، هغه ادعا چې هم طالبانو او هم ټيټيپي ډلې په وار، وار رد کړې ده.
