په بلوچستان کې د پوځ پر یوه مرکز برید کې ۷ تنه امنیتي سرتېري وژل شوي دي
امنیتي سرچېنو منلې، چې په دغه برید کې چې د بلوچستان ایالت په کلات سیمه کې پر یو پوځي مرکز شوی، اووه تنه امنیتي ځواکونه وژل شوي او ۱۵ نور ټپیان دي.
سرچېنې وایي، چې دغه برید د شپې ناوخته شوی او وسلهوالو له سپکو او درنو وسلو څخه کار اخیستی؛ خو امنیتي سرچینو په دغه برید کې وسلهوالو ته د اوښتې مرګ ژوبلې په اړه څه نه دي ویلي.
د دغه برید پړه د بلوڅ ازادي غوښتونکي پوځ منلې او د یوې خبرپاڼې په خپرولو سره یې ویلي، چې په دغه برید کې یې امنیتي ځواکونو ته د سر او مال درانه زیانونه اړولي دي.
په دې وروستیو کې د خیبر پښتونخوا او بلوچستان په صوبو کې د تاوتریخوالي پېښې زیاتې شوې، چې تر ډېره یې پړه ټيټيپي، د بلوڅ ازادي غوښتونکي غورځنګ او داعش خراسان ډلې په غاړه اخلي.
همدغه څو ورځې وړاندې د بلوچستان په کویټې کې د یو ځانمرګي برید له امله ۲۶ تنه ووژل شول او تر ۵۰ زیات ټپیان شوي وو.
