رویټرز: مارکو روبیو د ټرمپ ادارې د بهرنیو چارو وزیر په توګه ګومارل کېږي

رویټرز خبري اژانس راپور ورکړی، چې ډونالډ ټرمپ به سناتور مارکو روبیو د خپلې ادارې د بهرنیو چارو د وزیر په توګه وګوماري.

مارکو روبیو یو جمهوري غوښتونکی سناتور دی.
روبیو یو له هغو ۲۱ سناتورانو څخه دی، چې طالبان یې د یوې ترهکرې ډلې په توګه یاد کړي او په دې تړاو یې یوه لایحه هم وړاندې کړې وه.
له بل پلوه ټرمپ مایکل والز د ملي امنیت د سلاکار په توګه وټاکه.
والز بیا تر دې وړاندې په افغانستان کې د طالبانو سره د جګړې مخینه هم لري.
د دغو تازه ګومارنو په لړ کې ټرمپ لي زلدین د امریکا د چاپېریال ساتنې سازمان د مشر په توګه وګوماره.
نوموړی په کانګرس کې د نیویارک پخوانی استازی و.
د ډونالډ ټرمپ د لوړې مراسم به د راتلونکي کال په جنورۍ میاشت کې ترسره شي.