یونېسف: د هوا ککړتیا له امله په پاکستان کې ۱۱ مېلیونه ماشومان له ګواښ سره مخامخ دي
د ماشومانو لپاره د ملګرو ملتونو د ملاتړ صندوق (یونېسف) وایي، چې د ککړې هوا له امله په پاکستان کې ۱۱ مېلیونه ماشومان له ګواښ سره مخامخ دي او حکومت دې د دغه وضعیت مخه ونیسي.
یونېسف د یوې خبرپاڼې په خپرولو سره خبرداری ورکړی، چې د پاکستان په پنجاب ایالت کې له پنځو کلونو کم عمره ۱۱ مېلیونه ماشومان د ککړې هوا د تنفس له امله له ګواښ سره مخامخ شوي دي.
په پاکستان کې د یونېسف استازي عبدالله فادیل لهخوا د هوا د ککړتیا کمولو او د ماشومانو د روغتیا ساتنې لپاره د بېړنیو او لا زیاتو هڅو غوښتنه شوې.
د هوا د ککړتیا کچې په روانې اونۍ کې په لاهور او ملتان کې ریکارډونه مات کړي او د لسګونه ماشومانو په ګډون سلګونه ناروغان د ککړې هوا له کبله په روغتونونو کې بستري شوي دي.
په خبرپاڼه کې راغلي، په پاکستان کې د پنځو کلونو څخه کم عمره ماشومانو کې شاوخوا ۱۲ سلنه مړینې د هوا د ککړتیا له امله وې.
د دې تر څنګ، په ځینو ځپل شویو سیمو کې ښوونځي د روانې نومبر میاشتې تر نیمایي پورې تړل شوي او په ټوله کې بیا په پنجاب کې د شاوخوا ۱۶ مېلیونو ماشومانو زدهکړې ګډوډې شوې دي.
