طالبان: له دوو ګاونډیو هېوادونو څخه په یوه ورځ نږدې دوه سوه کورنۍ راستنې شوې

د طالبانو تر کنټرول لاندې باختر اژانس راپور ورکړی، چې د سې شنبې په ورځ له ایران او پاکستان څخه ۱۹۷ کورنۍ بېرته هېواد ته راستنې شوې.

دغه اژانس په اېکس پاڼې لیکلي، چې د تازه راستنو شویو کورنیو له ډلې څخه ۲۱ کورنۍ د ننګرهار ولایت د تورخم له لارې، ۸ کورنۍ د کندهار د سپین بولدک له لارې له پاکستانه راستنې شوې او ۵۲ کورنۍ د نیمروز ولایت د ورېښمو پله له لارې او ۱۱۶ کورنۍ د هرات ولایت د اسلام کلا له لارې له ایرانه راستنې شوې دي.
دغه اژانس د طالبانو د کډوالو وزارت له قوله لیکلي، چې ۳۹ کورنۍ خپلو اصلي سیمو ته لیږدول شوې او سلګونو کورنیو ته مرستې وېشل شوې دي.
بل خوا پاکستاني رسنیو راپور ورکړی، چې د روان ۲۰۲۴ کال د (اکتوبر له اومې نېټې د نومبر تر پنځمې) له پاکستانه ۲۶ زره او ۴۵۰ افغان کډوال ایستل شوي دي.
ويل کیږي، د نومبر تر پنځمې نیټې د ټولو ستنو شویو افغان کډوالو شمېر ۷۹۹۲۰۸ تنو ته رسېدلی.
په ورته وخت کې له ایران څخه هم د افغان کډوالو د اېستلو لړۍ د تېر یوه کال راهیسې دوام لري.
ایران په خپل هېواد کې پر بې اسناده کډوالو د کار کولو د بندیز ترڅنګ، په ښاري ميټرو، بسونو او نورو عامه خدمتونو کې هم بندیزونه لګولي دي.