د پاکستان ملي شورا د پوځ د رییسانو کاري موده پنځو کلونو ته وغځوله

د پاکستان ملي شورا ددغه هېواد د پوځ د ۱۹۵۲ کال په قانون کې تعدیلات تصویب کړل، چې په دې سره به د پوځ د رییسانو کاري موده له دې وروسته ددرېو کلونو پرځای پنځه کاله وي.

دغه قانون د پاکستان دفاع وزیر خواجه اصف ملي شورا ته وړاندې کړ او له تحریک انصاف ګوند پرته یې نورو ګوندونو ملاتړ وکړ او تصویب یې کړ.

ددغه تعدیل هدف د پاکستان د ټولو ځواکونو د رییسانو د کاري مودې ورته والی ښودل شوی او په دې توګه به له دې وروسته د پوځ لوی درستیز او د آی ایس آی رییس هم د پنځو کلونو لپاره ټاکل کیږي.

ددغه قانون له مخې، د پوځ اوسنی لوی درستیز اصف منیر ددوو نورو کلونو لپاره هم پر خپله دنده پاتې کیږي.

د نویو تعدیلاتو له مخې، د پوځ د نورو افسرانو لپاره د تقاعد تګلارې او د عمر اصل به پر لوی درستیز د پلیتابه وړ نه وي.

له دندې وروسته لوی درستیز کولای شي چې بېرته پوځ ته ستون شي.

د دې مصوبې په غبرګون کې د تحریک انصاف ګوند غړي د پارلمان د مشر پر وړاندې راغونډ شول او د مصوبې کاپي پاڼې یې څیرې کړې.

تحریک انصاف ګوند د لوی درستیز پر څوکۍ د اصف منیر د کاري مودې له غځېدو سره مخالف دی، ځکه ددغه ګوند مشر او پلویان لوی درستیز د ګوند او د ګوند د مشر پر وړاندې د راټوکېدلو ستونزو لامل ګڼي.