بایډن د هرېس د ملاتړ لپاره د وروستي کمپاین په موخه خپل اصلي ټاټوبي سکرانټون ته ځي
د امریکا ولسمشر جو بایډن د دغه هېواد په روانو ولسمشریزو ټاکنو کې د خپلې مرستیالې کمالا هرېس د ملاتړ لپاره د وروستي کمپاین په موخه خپل اصلي ټاټوبي د سکرانټون ښار ته ځي.
نوموړی په داسې حال کې خپل ټاټوبی ته سفر کوي، چې د امریکا پخواني ولسمشر بارک اوباما ویلي و: «که د پنسلوانیا سکرانټون ښار نه وای، کوم جو بایډن به هم نه و.»
سکرانټون ته د بایډن د سفر موخه دا ده، چې د یوه مهم نوساني ایالت په یوې حیاتي برخه کې خپل نفوذ وکاروي، ترڅو د سې شنبه د ورځې په ټاکنو کې یې جمهوري غوښتونکې سیاله ډونالډ ټرمپ ته ماته ورکړي.
په دغو ټاکنو کې بایډن له خپلې نوماندۍ څخه تېر شو او له کمالا هرېس څخه یې ملاتړ اعلان کړ.
دا په داسې حال کې ده، چې ډموکراټه کمالا هرېس او جمهوري غوښتونکی ډونلډ ټرمپ یوازې درې ورځي د امریکا له ولسمشریزو ټاکنو مخکې بیا د شنبې په ورځ شمالي کارولینا ته تللي، ترڅو په ټاکنیزو سیالیو کې د امریکا په سویل ختیځ کې ملاتړ ترلاسه کړي.
هرېس خپلو پلویانو ته خبرداری ورکړی، چې ډونلډ ټرمپ او د هغه متحدین به په ټاکنو کې د بریا په صورت کې د روغتیایې بیمې دولتي پروګرامونه محدود کړي.
د امریکا د را روانو ولسمشریزو ټاکنو په اړه نظر پوښتنې ښیې، چې د هرېس او ټرمپ ترمنځ د ټاکنو سیالي ډېره نږدې روانه ده او اوه ایالتونه کې د نظر پوښتنو پایلې ډېرې سره نږدې دي او همدا ایالتونه د دغو ټاکنو سرنوشت ټاکي.
