زلمی خلیلزاد: د پاکستان حکومت دې ژر تر ژره عمران خان له زندانه خوشې کړي
د افغانستان په چارو کې د امریکا مخکنی استازی زلمی خلیلزاد وايي، د پاکستان حکومت دې ژر تر ژره عمران خان له زندانه ازاد کړي. هغه د عمران خان د مېرمنې او خور په خوشې کېدو خوښي وښوده.
د افغانستان په چارو کې د امریکا مخکني استازي زلمي خلیلزاد نن یکشنبه د (لړم شپږمه) په خپله ایکس پاڼه لیکلي چې د پاکستان حکومت باید د پاکستان تحریک انصاف ګوند مخکنی مشر عمران خان له زندانه خوشې کړي.
هغه وايي، په دې خوښ دی چې د پاکستان اوسني حکومت د عمران خان مېرمن بشرا بي بي او د هغه خور له بنده ازادې کړې دي.
د عمران خان په مشرۍ تحریک انصاف ګوند د تېرې جمعې په ورځ ویلي و، چې د ښاغلي خان مېرمن بشرا بي بي له نهه میاشتې زندان وروسته خوشې او خپل کور ته ستنه شوه.
بشرا بي بي د توشه خانې دوه کېس له امله په ایډیاله زندان کې بندي وه.
بشرا بي بي تر خوشي کېدو وروسته لاهور ته تللې ده. او د عمران خان پر پلویانو یې غږ کړی چې لارو کوڅو ته راووځي او د خان د خوشې کېدو لپاره غږ پورته کړي.
د پاکستان تحریک انصاف ګوند مخکنی مشر او د پاکستان پخوانی لومړی وزیر عمران خان لا هم په ایډیاله زندان کې بندي دی.
