د خوړو نړۍوال پرواګرام: له هرو درېیو افغانو نجونو یوه یې له لومړنیو زدهکړو بې برخې ده
د ملګرو ملتونو د خوړو نړۍوال پروګرام وايي، افغانې نجونې د لومړنیو زدهکړو د نه بشپړولو له ګواښ سره مخ دي. یاد سازمان ویلي، چې له هرو درېیو افغانو نجونو یوه یې له لومړنیو زدهکړو بې برخې ده.
د ملګرو ملتونو د خوړو نړۍوال پروګرام د یکشنبې په ورځ د (تلې اتمه) په خپله اېکس پاڼه لیکلي، چې افغانې نجونې د لومړنیو زدهکړو د نه بشپړولو له ګواښ سره مخ دي.
دغه سازمان وايي، د دوی ډیری هغه زدهکوونکي د بې وزلۍ او فقر له امله، لومړنۍ زدهکړې له وخت مخکې پریږدي.
د ملګرو ملتونو د خوړو نړۍوال پروګرام وايي، فقر او بېوزلي یو بل لامل دی چې افغان نجونې زدهکړې نه شي بشپړولی.
یاد پروګرام وايي، ډیری ماشومان یوازې په ډوډۍ او چایو ژوند کوي.
د خوړو نړۍوال پروګرام لیکلي دي: «د خوړو نړۍوال پروګرام له لوري په ښوونځيو کې ډوډۍ یوازینۍ تغذیه ده چې دوی (زدهکوونکي) ته هره ورځ ورکول کیږي.»
دا په داسې حال کې ده، چې د ملکرو ملتونو د خوړو نړۍوال پروګرام په خپل وروستي راپور کې ویلي و، چې ۱۲،۴ میلیونه وګړي په افغانستان کې خوراکي خوندیتوب نه لري.
د یاد پروګرام د راپور له مخې، په هرو څلورو افغانانو کې یو یې په دې نه پوهیږي، چې د خپل راتلونکي وخت خواړه له کومه کړي.
د خوړو نړۍوال پرورګرام ویلي و، چې دوی د ۲۰۲۴ کال تر ډېسمبر میاشتې پورې په افغانستان کې د بیړنیو بشري مرستو رسولو لپاره ۶۱۷ میلیونه ډالرو ته اړتیا لري.
