ګنډا پور: په پنجاب کې زموږ پر غړو مرمۍ وریږي د یوې مرمۍ ځواب به په لسو مرمیو ورکوو
د خېبر پښتونخوا مشر وزیر علي امین ګنډاپور په رسمي توګه د انقلاب اعلان وکړ او په پنجاب ته په اشارې یې وویل، چې که څوک د یوې مرمۍ ډز وکړي؛ نو ځواب به یې پر لسو مرمیو ورکوي. په يو ويډيويي بيان کې علي امين ګنډاپور ویلي دي، چې زمونږ وقار تر پښو لاندې کیږي.
هغه وويل، چې نن یې د ګوند پر غړو مستقيم د ډزو له امله تر ٥٠ زيات کارکوونکي ټپيان شوي دي.
هغه زیاتوي؛ د پنجاب په حدودو کې په هرو درې کيلومترۍ کې پر موږ د مرمیو باران روان دى.
علي امین ګنډاپور وویل، چې له دې وروسته مه څوک ډزې وکړي، بیا به وویشتل شي.
هغه ویلي دي، چې د پښتونخوا خلک دې په قبایلو کې جرګې وکړي، ټول دې سره متحد شي.
علي امین ګنډاپور په دې ویډیوي پېغام کې وویل، چې نظامیان د ملت غږ نه شي کېدی او نه هم دوی د ولس رایو ته درناوی کوي.
هغه وویل: «نن زه د منظم انقلاب اعلان کوم، له انقلاب پرته بله حل لاره نه شته.»
علي امین ګنډاپور چې د پاکستان د تحریک انصاف ګوند غړی دی او د دې ګوند بندي مشر عمران خان د خلاصون لپاره د لاهور په شمول ګڼو ښارونو کې لاریونونه شوي دي.
دغه ګوند له هغه په لاریونونو لاس پورې کړ، چې په وینا یې د پاکستان په تېرو ټاکنو کې پراخه درغلي شوې ده او همدراز ټینکار کوي چې عمران ته ددې هېواد نظامیانو تر څنګ د شهباز شریف په مشری حکومت ورته بېلابیلې دسیسې جوړوي.
