د پاکستان او عراق لومړي وزیران د خپلمنځي اړیکو پر پیاوړتیا سلا شول
د پاکستان لومړی وزیر او عراقی سیال یې د اسلام اباد او بغداد ترمنځ د خپلمنځي اړیکو پر پیاوړتیا او پراختیا سلا شول.
شهباز شریف او محمد شیعه السوداني پرون په نیویارک کې د ملګرو ملتونو د ۷۹ سرمشریزې په څنډه کې سره ولیدل.
د پاکستان راډیو د راپور له مخې دواړو مشرانو پرېکړه وکړه چې د خپلمنځي اړیکو د پیاوړتیا لپاره له اوسنیو اسانتیاوو کار واخلي.
ښاغلی شریف او عراقی سیال یې پر خپلمنځي اړیکو سربېره د سیمې او نړۍ پر وضعیت هم غږېدلي او په غزه کې یې پر روان حالت اندېښنه ښودلې ده.
شهباز شریف د ایران له ولسمشر او د اروپايي ټولنې له مشرې، د بریتانیا له لومړي وزیر او د پیسو نړیوال صندوق له مشر سره هم لیدلي دي.
ټاکلې ده چې شهباز شریف نن د ملګرو ملتونو امنیت سرمشریزې ته وینا هم وکړي.
