منظور پښتین بیا د علي وزیر او نورو بندي غورځنګیانو د خوشې کېدو غوښتنه وکړه
د پښتون ژغورنې غورځنګ مشر بیا د پاکستان پر حکومت غږ وکړ چې د دې غورځنګ مخکښ مشر علي وزیر او نور غړي یې خوشي کړي. منظور پښتین د علي وزیر او د غورځنګ د نورو بندي غړو شهزاد خان، مولانا زینت الله، سلمان طوري او عزت افغان یادولو سره وايي، «دا ټول په ظلم او جبر زندان کې ساتل کېږي.»
ښاغلی پښتین نن خپل فیسبوک کې د علي وزیر د خوشي کولو له غوښتنې سره پر دې هم نیوکه کړې، چې ښاغلی وزیر ولې پنجاب کې بندي دی، ځکه هلته یې کوم څه هم نه و کړي.
د اسلام اباد پولیسو د تېر اګسټ پر دویمه علي وزیر په اسلام ابادکې ونیو او پر نوموړي یې درې تورونه ولګول.
سره له دې چې محکمې د روانې سپټمبر میاشتې پر څلورمه د ښاغلي وزیر ضمانت منلی او د خوشي کولو امر یې کړی، خو نوموړی لا هم په بند کې دی.
د علي وزیر او د غورځنګ د نورو مشرانو زندان په داسې حال دی چې پښتون ژغورنه غورځنګ د اکتوبر پر ۱۱ د پښتنو تاریخي جرګه را بللې ده.
د غورځنګ مشر منظور پښتین او نور غړي یې د دې جرګې د کامیابولو لپاره د پاکستان مختلفو سیمو ته ځي او مختلفو خلکو ته په جرګه کې د ګډون بلنه ور کوي.
