د اروپایي کمېسیون مشرې د جمعې په ورځ (د وږي ۳۰مه) اوکراین ته سفر کړی او د اوکراین ولسمشر سره په یوې ګډې خبرې غونډه کې یې د کییف د بودجې د کسر حلولو لپاره د ۳۵ میلیاردو ډالرو پور اعلان کړی.
مېرمن فون در لاین، کییف ته سفر کړی تر څو د اروپا د ملاټړ او په ژمي کې د دفاع لپاره د چمتوالي په اړه له زلېنسکي سره خبرې وکړي.
اروسولا فون در لاین، له ولادیمیر زلېنسکي سره په ګډه خبري غونډه کې وویل، چې پر اوکراین د روسیې بې رحمانه بریدونه په دې مانا دي چې دغه هېواد د اروپايي ټولنې دوامدار ملاتړ ته اړتیا لري.
اروپايي ټولنه په داسې حال کې اوکراین ته ۳۵میلیارده یورو پور ورکړي، چې دغه هېواد د روسیې د بریدونو په وړاندې مقاومت ته دوام ورکوي او په پوځي برخه کې خورا ډیرو مرستو ته اړتیا لري.
تر اوسه روسیې د اوکراین د انرژۍ زیربناوې سختې ویجاړې کړې او د دغه هېواد په ختیځ کې یې پرمختګونه کړي دي.
د روسیې او اوکراین ترمنځ په څه باندې دوه کلنه جګړه کې د مړو او ټپیانو ټولټال شمېر یو میلیون کسانو ته رسېدلی دی.