د پاکستان د روغتیا وزارت د دوشنبې په ورځ وویل، چې د اسلام اباد په نړۍوال هوایي ډګر کې یې د اېم پاکس ناروغۍ شپږمه پېښه موندلې ده.

د پاکستان د عامې روغتیا وزارت ویاند ساجد شاه ویلي، دغه ۴۴ کلن ناروغ له خلیجي هېواده راغلی و.
هغه وویل، ناروغ اوس په پمز روغتون کې تر درملنې لاندې دی.
د ملي روغتیا خدمتونو په برخه کې د پاکستان د لومړي وزیر همغږي کوونکي مختار بهارت وویل، په هوایي ډګرونو کې یې د دغې ناروغۍ د پېژندلو برخه کې ګټور ګامونه اخیستي دي.
هغه وایي، د خلکو د ساتنې لپاره لا اغېزمن ګامونه اخیستل کېږي.
هغه زیاته کړه، چې مرکزي او صوبايي حکومتونه د اېم پاکس پر وړاندې د مبارزې لپاره له خپلو ټولو امکاناتو کار اخلي.
تر دې وړاندې د چهارشنبې په ورځ په پېښور کې د اېم پاکس پنځمه پېښه ثبت شوې وه.
دغه ۳۳ کلن ناروغ هم پېښور ته تر سفر مخکې د اسلام اباد نړۍوال هوايي ډګر ته له یوه خلیجي هېواده راغلی و.
له دې وړاندې د اېم پاکس څلور نورې پېښې هم په پېښور کې ثبتې شوې وې.
په پېښور کې روغتیایي چارواکي وایي، چې (د سپټمبر په ۸مه) په خېبرپښتونخوا کې ټول څلور ناروغان رغېدلي او له منفي ازموینې وروسته له روغتونه رخصت شوي وو.