په ایران کې د معترضو ښځو غورځنګونو یو وار بیا له طالبانو سره د ځینو هېوادونو او بنسټونو د نږدې والي او تعامل په برخه کې خپل اعتراض څرګند کړ.

دغو غورځنګونو د یوه پرېکړه لیک په خپرولو سره د طالبانو سره د تعامل او نږدې والي، د کډوالو د مېشتېدنې په برخه کې د ستونزو او ننګونو او په تهران کې د ملګرو ملتونو د بې غورۍ په اړه نیوکه کړې ده.
په دغه پرېکړه لیک کې راغلي، چې په ایران کې دې د ملګرو ملتونو استازولي د ښځو حقونو له فعالینو، پخوانيو پوځیانو او د بشري حقونو له فعالینو ملاتړ وکړي.
دغو غورځنګونو ویلي، چې طالبانو د درېیو کالو په تېرېدو سره د هیڅ ډول تاوتریخوالي، جنایت، بېلابېلو تبعیضونو، تېري، نیونې، ربړوونې، هدفي وژنې، د بیان ازادۍ غږ بندولو او له ټولنې د ښځو بشپړ حذفولو په برخه کې ډډه نه ده کړې.
دوی وایي، د دې پر ځای چې هېوادونه او نړۍواله ټولنه پر طالبانو فشار راوي؛ دوی برعکس د طالبانو له ډلې سره د تعامل په لټه کې دي.
دوی له ملګرو ملتونو، نړۍوالې ټولنې او د بشري حقونو له ملاتړو سازمانونو غوښتي، چې د شعارونو او راپورونو خپرولو پرځای دې جدي، کوټلي او عملي ګامونه واخلي.