سوېډن د اوکراین لپاره د ۴۴۰ میلیونو ډالرو مرستې بسته اعلان کړه
د سوېډن د دفاع وزیر پال جانسن د دوشنبې په ورځ وویل، چې دغه هېواد به اوکراین ته خپله ۱۷مه د مرستو بسته د ۴،۶ میلیارده سوېډني کرونو په ارزښت (۴۴۳ میلیونه ډالره) له د نورو پوځي مرستو سره ولیږي.
په نوې کڅوړه کې به د پیاده جنګي وسایطو لپاره مهمات شامل وي، چې د مخه د سوېډن له خوا ورکړل شوي او همدارنګه هغه وسایل چې په راتلونکي کې به د ګریپین جنګي جټ الوتکو لیږد اسانه کړي.
د دغو الوتکو د لېږد په اړه لا نهايي پرېکړه نه ده شوې.
جانسن په یوه خبري کنفرانس کې وویل: "موږ غواړو چې په راتلونکي احتمالي پړاو کې اوکراین ته د ګریپین جنګي الوتکو د مرستې وړتیا ولرو."
جانسن وویل، چې په مرستو کې اضافي جنګي کښتۍ، توغندي او د سرتېرو نور وسایل او همدارنګه د اوکراین لپاره د دفاعي تدارکاتو تمویل شامل دي.
د دغو مرستو په اړه پرېکړه د کییف سره په نږدې همکارۍ کې شوي.
د کڅوړې ارزښت شاوخوا نیمایي برخه د سوېډن د خپل هوایي ځواک لپاره د وروستي ماډل ګریپین ای جنګي الوتکو په تولید کې اړین وسایل جوړوي.
دا به په دې معنا ده، چې سوېډن به خپلې زړې جیټ الوتکې په راتلونکي احتمالي نېټه اوکراین ته انتقال کړي.
حکومت په یوه اعلامیه کې ویلي: "اوس مهال اوکراین ته د ګریپین الوتکو د لیږدولو پلان ځکه نه لري چې ښايي دغه هېواد ته د اف – ۱۶ الوتکو د لېږد پروسه کې ستونزې رامنځته کړي."
