په سوریه کې د اسراییل په تازه بریدونو کې لږ تر لږه ۱۶ کسان وژل شوي دي
د سوریې دولتي رسنیو د دوشنبې په ورځ راپور ورکړی، چې د دغه هېواد په لویدیځ کې د اسراییل په هوايي بریدونو کې ۱۶ کسان وژل شوي او لسګونه نور ټپیان شوي دي. دغه برید د اپریل په میاشت کې په دمشق کې د ایران پر سفارت تر برید وروسته د اسراییل تر ټولو خونړی برید بلل کیږي.
د اسراییل له خوا لا تر اوسه د دغه برید په اړه کومه تبصره نه ده شوې.
دغه هېواد تر ډېره په سوریه کې د بریدونو په اړه چوپه خوله پاتې کیږي.
د سوریې دولتي خبري اژانس سانا د یوې پوځي سرچینې په حواله ویلي، چې اسراییل د شپې شاوخوا ۱۱:۲۰ دغه بریدونه کړي او "په مرکزي سیمه کې یو شمېر نظامي موخې" په نښه کړې دي. هغه د برید په اړه د نورو جزییات له ورکولو ډډه کړې ده.
سرچینې ویلي، چې د سوریې هوايي دفاعي سیسټم د اسراییل یو شمېر توغندي رانسکور کړي دي.
سانا د یو ځايي روغتیايي چارواکي له قوله ویلي، چې په دغه برید کې ۳۶ کسان ټپیان شوي، چې د شپږو روغتیايي حالت نازک دی.
دوو سیمه ییزو استخباراتي سرچینو رویټرز خبري اژانس ته ویلي، چې د مدیترانې ساحل ته څېرمه د حما ولایت په مسیاف ښار کې د کیمیاوي وسلو د تولید پر یو لوی پوځي مرکز څو ځلې برید شوی دی.
دوی ویلي، چې ګومان کېږي د ایران د پوځي کارپوهانو یوه ډله د وسلو په تولید کې ښکېله وي.
دمشق او تهران ته نږدې سیمه ییزې پوځي سرچینې دغه معلومات رد کړي، چې ګواکې دا د کیمیاوي وسلو مرکز و او ویلې یې دي، چې د برید هدف د سوریې د څېړنو یو مشهور مرکز و.
د سوریې د بهرنیو چارو وزارت دغه برید په کلکو ټکو غندلی دی.
د سنا له خوا په خپور شوي راپور کې ویل شوي، چې برید کې د ۱۶ کسانو د وژل کېدو او ۳۶ کسانو د ټپي کیدو سربېره "د استوګنې ځینو سیمو ته مادي زیانونه اوښتي."
د ایران د بهرنیو چارو د وزارت ویاند ناصر کنعاني ویلي، تهران په سوریه کې دغه "جنایي برید" په کلکه غندي.
هغه د یوې خبري غونډې پر مهال وویل: "موږ هغه رپوټونه نه تاییدوو چې د صهیونیستي رژیم (اسراییل) پورې تړلو رسنیو له خوا د ایران په یوه مرکز یا د ایران تر ساتنې لاندې مرکز باندې د برید په اړه خپاره شوي دي."
د سوریې دولتي رسنیو هم راپور ورکړی، چې بریدونه د دوو اورلګېدنو لامل شوي، چې د اور وژونکو له خوا یې د کنټرول هڅه کیږي.
اسراییل له کلونو راهیسې په سوریه کې هغه څه په نښه کوي، چې دوی یې د ایران یا ایران ملاتړي اهداف بولي، چیرې چې ایراني ځواکونه او د تهران ملاتړې ملېشې د سوریې د کورنۍ جګړې پر مهال د ولسمشر بشارالاسد ملاتړ لپاره په پراخه کچه ځای پرځای شوي دي.
