په کراچۍ ښار کې د یوې مدرسې طالبان چې ټول یې افغانان دي، یوه میاشت وړاندې د پاکستان حکومت له لوري نیول شوي.
په کراچۍ کې د طالبانو قونسل د پاکستان له حکومته د دغو طالبانو د راخوشې کولو غوښتنه کړې.
په کراچۍ کې د طالبانو قونسلګري د یوې خبرپاڼې په خپرولو سره وايي، چې د پاکستان د سند ایالت په کراچۍ ښار کې پولیسو د تعلیم الاسلام په نوم پر یوې دیني مدرسې چاپه وهلې، چې په پایله کې یې د یادې مدرسې ۲۱ افغان طالبان او یو ښوونکی نیولي او دا مهال د کراچۍ ښار په زندان کې بندیان دي.
دغه طالب زدهکوونکي په پاکستان کې د اوسېدو د قانوني اسنادو د نشتوالي له امله بندیان شوي دي.
په کراچۍ کې د طالبانو قونسل عبدالجبار تخاري وايي، د یادو طالب زدهکوونکو د احوال اخیستو او تداوۍ په موخه زندان ته د یوې روغتیايي ډلې سره ورغلی.
نوموړی وايي، د یو شمېر طالب زدهکوونکو روغتیايي حالت د اندېښنې وړ دی.
عبدالجبار تخاري په یو ویډیویي پیغام کې وايي، شپه او ورځ هڅې کوي چې د پاکستان د حکومت له لوري بندي شوي طالب زدهکوونکي راخوشې کړي.
نوموړی وايي، په یادو طالب زدهکوونکو کې د ډېرو عمر ان تر لسو کالو هم کم دی.
ښاغلي تخاري د پاکستان له حکومته غوښتنه کړې، چې بندي شوي طالب زدهکوونکي دې ژر تر ژره خوشې کړي، چې په افغانستان کې خپلو زدهکړو ته دوام ورکړي.
د پاکستان حکومت تر اوسه د یادو طالب زدهکوونکو په اړه څه نه دي ویلي.
د پاکستان بلوچستان او سند ایالتونو کې زرګونه مدرسې شته، چې په دغو مدرسو کې له افغانستانه ورغلي لسګونه زره ماشومان او تنکي ځوانان په دیني زدهکړو بوخت دي.