د ملا هبت الله نوی فرمان: له ویاندویانو پرته بل څوک د طالبانو له ادرسه څرګندونې نه شي کولی

د طالبانو مشر ملا هبت الله په یوه نوي فرمان کې راغلي، چې له مرکزي او د وزارتونو ترڅنګ د نورو ادارو له وياندويانو پرته هېڅوک نه شي کولای د طالبانو له ادرسه څرګندونې او نشرات وکړي. په فرمان کې راغلي، چې وياندويان نشي کولی د ورکړل شویو امورو څخه پرته په نورو چارو کې څرګندونې وکړي.

د طالبانو تر واک لاندې باختر دولتي اژانس د دوشنبې په ورځ (د وږي ۵مه) د دې فرمان په اړه لیکلي، چې د دې ډلې ویاندویان مکلف دي چې یوازې د طالبانو د موخو، پالیسیو، فعالیتونو، لاسته راوړنو او ځینو نورو مواردو په اړه اطلاعات رسنیز کړي.
په فرمان کې راغلي، چې د طالبانو ټول ویاندویان دې له هغو سیاسي او ټولنیزو څرګندونو ډډه وکړي، چې په کې د طالبانو موقف واضیح نه وي.
د دغه فرمان په یوه بله برخه کې زیاته شوې: «د وزارتونو او امارتي ادارو د وياندويانو فعاليتونه يوازې په اړوند وزارت یا ادارې پورې محدود دي او د وزارتونو او امارتي ادارو وياندويان مكلف دي، چې د مطالبو له خپرولو څخه مخکې د اړوند وزارت یا ادارې له مقام څخه اجازه ترلاسه کړي.»
د طالبانو مشر هبت الله اخوندزاده په دغه فرمان کې راغلي، چې د وزارتونو او ددې ډلې واک لاندې ادارو ویاندویان نه شي کولی، چې له ورکړل شویو مشخصو امورو څخه پرته په نورو چارو کې نشرات او څرګندونې وکړي.
د طالبانو دا فرمان ښيي، چې یاده ډله نه یوازې په عامو خلکو او رسنیو محدودیتونه وضع کوي، بلکې خپلې ادارې او ویاندویان یې هم محدود کړي دي.
د طالبانو د مشر له خوا دا فرمان په داسې حال کې خپریږي، چې تېره اونۍ هم د یادې ډلې مشر د امربالمعروف د بندیزونو په اړه نوی قانون توشیح کړ.
په دې قانون کې ویل شوي، چې «د فتنې له وېرې د ښځې ټول بدن او مخ پټول» اړین دي او د سړو جامې د طالبانو د دې قانون بله برخه ده.
د دغه قانون له مخې؛ د موسیقۍ خپرول، له محرم او حجاب پرته د ښځو تګ او په موټرو کې د نارینه او د ښځو يوځای کول منع دي.
د امربالمعروف وزارت چارواکي هم مکلف شوي، چې د ږیرې خريلو او کمول مخه ونیسي.
د دې قانون له مخې؛ که څوک د محتسبانو امر ونه مني هغه به «له یو ساعت څخه تر درېیو ورځو پورې زنداني او د محتسبانو له لوري به ټاکل شوې سزا» ورکړل شي.
د طالبانو وروستی قانون بیا په کور دننه او بهر کې د بشري او د ښځو د حقونو د فعالانو له پراخ غبرګون سره مخ شوی دی.