طالبانو په کندهار کې د ډرون کېمرې پر کارولو بنديز ولګاوه
په کندهار کې د طالبانو امنیه قومندانۍ خلکو ته خبردارۍ ورکړی، چې د ډرون کېمرې کارولو، انځور او ويډيو اخېستو څخه ډډه وکړي. ځينو سرچینو افغانستان انټرنشنل ـ پښتو ته ويلي، چې طالبانو د امنيتي اندېښنو له کبله دغه بنديز لګولی.
په کندهار ولایت کې د طالبانو امنيه قومندانۍ د دوشنبې په ورځ (د وږي ۵ مه) نېټه په يوې خبرتيا کې ویلي، چې په ډرون کېمرې سره د هر ډول انځور او ويډيو اخېستل منع دي.
طالبانو خلکو ته خبردارۍ ورکړی، چې د دې خبرتيا له خپرېدو وروسته چې هر هغه کس «د ډرون کېمره استعمال کړي له قانوني چلند سره به مخ شي.»
په کندهار کې ډرون کېمرې تر ډېره د کورنیو او بهرنیو سېلانيانو له خوا کارول کیږي.
دغه سېلانیان د کندهار له مېله ځايونو، ښکلو او تاريخي سېمو څخه ويډيوګانې او انځورونه اخلي او بیا یې په ټولنيزو رسنيو کې خپروي.
په کندهار کې د طالبانو امنيه قومندانۍ په رسمي ډول د ډرون کېمرې پر انځور اخېستو د بنديز لامل نه دی روښانه کړی.
ځينو سرچينو افغانستان انټرنشنل ـ پښتو ته ويلي، چې طالبانو دغه بنديز د امنيتي پېښو د مخنيوي لپاره کړی.
سرچينه زياتوي: «طالبان ويره لري، چې هسي نه د همدې ډرون کېمرې په ذريعه د امنيتي تاسیساتو او د طالب د مشرانو له کورونو او مېلمستونو څخه ويډيو وا نه خېستل شي.»
څه موده مخکې په کندهار کې پر رسنيو د نورو بنديزونو سره سره پر ويډيو اخېستو هم بنديز لګول شوی و.
د طالبانو د کندهار والي ملا شيرین په یوه مکتوب کې د دولتي ادارو مسولينو ته ويلي، چې د خپلو رسمي او نارسمي ناستو انځورونه او ویډیوګانې دې نه اخلي.
په کندهار کې پر انځور او ويډيو د طالبانو د والي ملا شيرين د بنديز سره سم ولایت مقام په خبرپاڼو کې د خپلو ناستو انځورونه هم بند کړي او يوازي په ليکلې بڼه خپل خبرونه شريکوي.
دا په داسې حال کې ده، چې طالبانو په خپله لومړنۍ پنځه کلنه واکمنۍ کې هم پر انځور اخېستو بندیز لګولی و او دغه کار یې له اسلام سره په ټکر کې بللی و.
دغې ډلې په دویم ځل واک ته تر رسېدو وړاندې په دوحه کې د مذاکراتو پر مهال ژمنه کړې وه، چې دوی له پخوا بدل شوي او دا ځل به یې چارې او بندیزونه د پخوا په څېر نه وي.
