سوېلي وزیرستان کې وسله والو د یوه ښوونځي دوه ښوونکي په ډزو وژلي

ځايي پولیس وايي، د سوېلي وزیرستان په مرکز واڼه کې ناڅرګندو وسله والو د يوه ښوونځي دوه ښوونکي په ډزو وژلي او وسله وال له سیمې تښتېدلي دي. پولیس وايي، د وسله والو د پلټنې عملیات یې پیل کړي او د سیمې له خلکو یې هم د هغوی په موندلو کې مرسته غوښتې.

سرچینو له سوېلي وزیرستانه افغانستان انټرنشنل پښتو ته ويلي، چې دغه د ښوونځي دوه ښوونکي نن دوشنبه (زمري ۱۵مه) له غرمې مخکې د سوېلي وزیرستان مرکز واڼه په لنډي ډوک سیمه کې مخ پټو وسله والو په ډزو ووژل او هغوی له سیمې وتښتېدل.

په سیمه کې خپلواک خبریال لال وزیر وايي، دا څووم ځل دی چې په وزیرستان کې د ښوونځي ښوونکي په نښه او وژل کیږي خو د ده په خبره امنیتي ځواکونه په سیمه کې د امن په راوستو کې پاتې راغلي.

تر اوسه پورې کومې وسله والې ډلې د دغې پېښې په اړه څه نه دي ويلي.

د محمود او محمد انور په نومونو د دغو دوو ښوونکو د کورنیو غړي وايي، چې دغه ښوونکي له ښوونځي څخه د کور په لور روان وو چې د وسله والو له خوا په نښه شول.

په دې وروستیو کې په لوی وزیرستان کې د ولسي خلکو، خبریالانو او ښوونکو هدفي وژنې او په بمونو د ښوونځیو الوځولو پېښې تر پخوا یو مخ زیاتې شوې دي او د سیمې خلک شکایت کوي چې حکومت په دغو سیمو د امن په راوستو کې پاتې راغلی.