ماهرنګ بلوڅ: پاکستاني حکومت مو ژوند له کواښ سره مخ کړی او نیولو ته مو پلمې لټوي
د بلوچستان ایالت په ګوادر کې د بلوڅو د پیوستون کمېټې له لوري د پیل شوي پرلت سرلارې ماهرنګ بلوڅ وايي، د دوی د غونډې پر مهال د نیول شويو کسانو خوشې کولو، د بلوڅو ځورولو، د کورونو ویجاړولو، د موټرو سوځولو د بهیر درولو او ور اوښتو زیانونو له ورکولو وروسته به حکومت سره خبرو ته کیني.
نوموړې وايي، د دې د همکارانو په ګډون یې ژوند له جدي ګواښ سره مخ دی او حکومت یې د نیولو پلمې لټوي.
د بلوڅ پیوستون کمېټې او په ګوادار کې د روان پرلت سرلارې ماهرنګ بلوڅ د یکشنبې په ورځ د (زمري ۱۴مه) په خپله اېکس پاڼه لیکلي؛ چې حکومت د دوی د غوښتونو منلو پر ځای له دوی سره له زوره کار اخلي.
نوموړې وايي: «زه، له زرګونو نورو بلوڅانو سره، اوس هم په ګوادر کې یم، دلته انټرنیټ بند شوی، سړکونه بند شوي، او پر رسنیو بشپړ سانسور لګول شوی. مهار شوې رسنۍ په دوامداره توګه کارول کیږي او موږ په تاوتریخوالي تورنوي چې ګواکې خبرو اترو ته لیوالتیا نه لرو.»
نوموړې زیاتوي چې، د دوی د غونډې برخه وال له لومړۍ ورځې د حکومت له بریدونو او تاوتریخوالي سره مخ دي.
ماهرنګ بلوڅ وايي، د تېرې جولای میاشتې په ۲۸مه، د پاکستاني حکومت له لوري د سړکونو، ، لویو لارو او انټرنیټ بندېدو، پر سولهییزو لاریون کوونکو ډزو او نیول کېدو له امله یې ملي غونډه په پرلت واړوله.
اغلې بلوڅ وايي، ، په مستونګ، ګوادر، نوشکي، تربت، اتلار او د بلوچستان په نورو سیمو کې پر لاریون کوونکو د ډزو کوونکو پر ضد د قضیو ثبتولو، په ګوادر او د بلوچستان په نورو برخو کې د بندیزونو لرې کولو، د زورزیاتي څخه د کار نه اخیستلو، د حکومت له لوري د نیول شویو کسانو خوشې کولو، د ویجاړو شویو کورونو د زیان ورکولو وروسته د حکومت سره د خبرو اترو د چاپيریال رامنځته کولو لپاره خبرو اترو ترسره کېدو ته چمتو ده.
نوموړې وايي: «اوس، ټول حکومتي بنسټونه زموږ په وړاندې د کړکیچ د مشروعیت لپاره کارول کیږي، موږ په لوی خطر کې اچوي. حالات د نواب اکبر خان بګټي د وخت له پېښو سره ورته دي، چې په کې د خبرو اترو ادعا شوې وه، خو زور کارول شوی و.»
ماهرنګ بلوڅ د بشري حقونو پر سازمان او ډلو غږ کوي، چې د پاکستان حکومت او بلوڅانو تر منځ د رامنځته شویو مسایلو په اړه مداخله وکړي او د پاکستان حکومت له لوري د دغه سیاسي ناوړه کار مخه دې ونیول شي.
د بلوڅو د پیوستون کمېټې د جولای په ۲۸مه نېټه د بلوچستان ایالت ګوادر سیمې ته د پاکستان له هرې سیمې څخه د بلوچستان د یوې لویې او ملي غونډې لپاره وربللي وو، چې د پاکستان حکومت له لوري د بلوڅانو د ورتګ د مخنیوي تر څنګ پر غونډه هم برید وشو او اوس یاده غونډه کې په پرلت اوښتې ده.
