طالبانو په کابل کې د اسماعیل هنیه لپاره د فاتحې مراسم ترسره کړل

طالبانو د یکشنبې په ورځ (د زمري ۱۴مه) د کابل په عیدګاه جومات کې د حماس د سیاسي دفتر د مشر د فاتحې مراسم ترسره کړل. په هغو ویډیوګانو کې چې په ټولنیزو رسنیو کې خپاره شوي لیدل کیږي، چې د دې مراسمو ګډون کوونکو د طالبانو او فلسطین بیرغونه پورته کړي دي.

د مراسمو له ترسره کېدو مخکې یو شمېر طالب چارواکو د ټولنیزو رسنیو له لارې له خلکو غوښتي و، چې په دې مراسمو کې برخه واخلي.
دا په داسې حال کې ده، چې د طالبانو د اطلاعات او فرهنګ وزارت د نشراتو او مطبوعاتو مشر عبدالواحد ریان هم د دې مراسمو یوه ویډيو په خپل اېکس کې خپره کړې ده.
د یادولو ده، چې دغه وزارت تر دې وړاندې د خپلو کارکوونکو په حضور کې د اسماعیل هنیه د فاتحې مراسم ترسره کړي و.
د یادې ډلې رییس الوزرا محمد حسن اخوند هم د هنیه له ترور کېدو پنځه ورځې وروسته د یوه پیغام په خپرولو سره اسراییل دوښمن بللی دی.
د حماس ډلې د سیاسي دفتر مشر اسماعیل هنیه په تهران کې د یوه برید په پایله کې ترور شو، چې مړه یې بیا د قطر په پلازمېنې دوحه کې خاورو ته وسپارل شو.
د طالبانو د رییس الوزرا سیاسي مرستیال مولوي عبدالکبیر هم د یوه پلاوي په مشرۍ بیا د نوموړي د جنازې په مراسمو کې برخه اخیستې وه.