ټيټيپي: د جولای په میاشت کې مو ۲۱۵ پاکستاني ځواکونو ته مرګ ژوبله اړولې
د پاکستاني طالبانو تحریک په خپل یو میاشتیني راپور کې لیکلي، چې د ۱۴۶ بریدونو له امله یې د پوځ او امنیتي ځواکونو ۹۱ کسه وژلي، ۱۲۴ یې ټپیان کړي او ۱۰ تنه نور یې ژوندي نیولي دي.
په هغې خبرپاڼه کې چې د دغې ډلې ویاند محمد خراساني خپره کړې او یوه کاپي یې افغانستان انټرنشنل پښتو ته رسېدلې ویل شوي، چې دغه بریدونه یې په ډېره اسماعیل خان، سویلي وزیرستان، بنو، پېښور، ملاکنډ، باجوړ، دېر، چترال، سوات، مردان، صوابۍ، کوهاټ، کورمه، ګلګېت، او د بلوچستان اړونده سیمو کې تر سره کړي؛ خو دا یې هم ویلي چې په کراچۍ کې یې هم یو برید ترسره کړی دی.
په خبرپاڼه کې د دغو بریدونو بڼې ته په اشارې سره ویل شوي، چې د لیزر، د خرپ او ترپ، ځوابي، لاسي بمونو، ځوابي بریدونه او هدفي وژنې شاملې دي.
خبرپاڼې وړاندې کاږلي، چې دغه بریدونه پر پوځي مرکزونو، د پولیسو په چوڼیو او د سولې په نامه پر جوړو شویو کمیټو ترسره شوي دي.
په خبرپاڼه کې دا هم ویل شوي، چې د دغو بریدونو په ترڅ کې یې ګڼ پوځي وسایط، موټرسایکل، مخابراتي سیسټمونه او پوځي ودانۍ ویجاړې کړې دي.
دا رنګه په خبرپاڼه کې دا ادعا هم شوې، چې د دغو بریدونو له امله یې ګڼې وسلې او مهمات هم نیولي دي.
د پاکستان د طالبانو تحریک د هرې میاشتې په پای کې د خپلو بریدونو په اړه دغه شان تفصیلي راپورونه خپروي؛ خو د دغه نوي راپور په اړه یې د پاکستان پوځ کوم غبرګون نه دی ښودلی، خو د همدغې میاشتې په ترڅ کې پاکستاني چارواکو هم د ډېرو دغو بریدونو منښته کړې او دا یې هم ویلي، چې ټيټيپي په افغانستان کې مرکزونه او روزنځایونه لري او له هماغه ځایه پر امنیتي ځواکونو دغه بریدونه پلانیږي، هغه ادعا چې تل د افغان طالبانو لهخوا په کلکه رد شوې ده.
