د افغانستان کرېکټ ملي لوبډله اول ځل له سويلي افريقا سره یو ورځنۍ لوبې کوي
د افغانستان کرېکټ بورډ له سويلي افريقا سره د دريو یو ورځينو لوبو مهالوېش اعلان کړ. دا لومړی ځل دی چې افغان ملي لوبډله له سوېلي افریقا سره درې یو ورځنۍ لوبې کوي. د افغانستان په کوربتوب دغه سيالۍ به په متحده عربي اماراتو کې د سپټمبر په ۱۸ پيل او د همدې مياشتي تر ۲۲ به دوام وکړي.
د افغانستان کرېکټ بورډ نن ویلي، په هند کې د افغانستان په کوربتوب د نيوزيلنډ لوبډلې په وړاندي له ټېسټ لوبې وروسته به د سويلي افريقا سره د دريو يو ورځنيو لوبو لړۍ پيل شي.
کرېکټ بورډ ويلي، چې د نيوزيلنډ سره د يوازينۍ ټېسټ لوبې او سويلي افريقا په وړاندي به ډېر ژر د لوبغاړو نوملړ اعلان کړي.
د افغانستان کرېکټ بورډ مشر ميرويس اشرف د سويلي افريقا سره د سيالیو په اړه وايي: «د خوښۍ ځای دی چې د لومړي ځل لپاره د سویلي افریقا سره دوه اړخیزه لوبلړۍ لرو، له شک پرته سویلي افریقا د کرېکټ په نړۍ کې یو ستر نوم دی او له اتلانو سره د دوی سیالۍ به له ولولو او خوندونو ډکې وي.»
د کرېکټ بورډ اجراييوي مشر نصيب خان وايي، چې له پياوړو لوبډلو سره لوبېدو ته د يوې پروسې په سترګه ګوري.
نوموړی وایي: «موږ غواړو چې افغان لوبډلې ته د ټولو بشپړ غړیتوب لرونکو لوبډلو پر وړاندې ډېرې دوه اړخیزې لوبلړۍ برابرې کړو.»
د افغانستان کرېکټ بورډ ليکلي، چې د سويلي افريقا سره تر سياليو وروسته تمه لري، چې له بنګله دېش سره هم د لوبو لړۍ پيل کړي.
