په چین کې د باران له امله رامنځته شوې ځمکه ښویېدنه کې ۱۲ کسان مړه شوي دي

د چین دولتي تلویزیون سي جي ټي ان د یکشنبې په ورځ راپور ورکړی، چې د چین په مرکزي هونان ولایت کې د باران له امله د رامنځته شوې ځمکې ښویېدنې له امله لږ تر لږه ۱۲ کسان مړه شوي دي.

دغه ځمکه ښویېدنه چې د سهار په اتو بجو د هینګ یانګ ښار په یولین کلي کې وشوه، د استوګنې د کور یوه برخه یې ویجاړه کړې ده.

ژغورونکو ١٨ کسان موندلي، چې له ډلې يې ١٢ مړه او شپږ نور ټپيان دي.

روغتون ته د لېږدول شویو ځینو ټپیانو وضعیت د اندېښنې وړ بلل شوی.

داسې بریښي، چې دغه ځمکه ښویېدنه د ګیمي په نوم توپان سره تړاو لري.

چین ته تر رسېدو مخکې دغه توپان په فیلیپین ۳۴ او تایوان کې ۱۰ کسان وژلي دي.