د پاکستان د پنجاب صوبې د کورنیو چارو وزارت د پنجشنبې په ورځ اعلان وکړ، چې د ترهګریزو ګواښونو له امله تر راتلونکو څو ورځو هر ډول لاریونونه، تحصن او راټولېدنې منع دي.
دغه محدودیتونه به د پنجاب په عمومي ځایونو کې تر راتلونکې یکشنبې پورې دوام ولري.
د پنجاب صوبې دا پرېکړه تر هغه وروسته وکړه، چې د پاکستان د تحریک انصاف لوړپوړي غړي اسد قیصر د عمران خان د ازادۍ په موخه د جمعې په ورځ د سراسري لاریونونو خبر ورکړ.
د پښتونخوا د ملي عوامي ګوند مشر محمود خان اڅکزي هم اعلان وکړ، چې د پاکستان د جمعیت ګوند د مشر مولانا فضل الرحمان په ملاتړ به د سیاسي بندیانو د ازادۍ لپاره د جمعې په ورځ پراخ لاریونونه وشي.
د یادې صوبې د کورنیو چارو وزارت ویلي، چې عمومي تجمعات به د ترهګرو لپاره نرم هدف وي.
د یاد وزارت په بیانیه کې راغلي، چې هر ډول سیاسي راټولېدنې به جدي امنیتي ګواښونه له ځان سره ولري او ددې احتمال شته چې عمومي سوله او نظم وګواښي.