منظور پښين: په فرانکفورت کې لاريون د خاصې کړۍ له لوري په تاوتريخوالي اوښتی
د پښتون ژغورنې غورځنګ مشر په فرانکفورټ کې د لاریون پر مهال تاوتريخوالی غندلی او نوموړي د عاملینو د نيولو غوښتنه کړې ده. منظور پښين ويلي، چې لاريون د دوی له لوري جوړ شوی و او ځينو کړيو د پلان له مخې په قصدي ډول د تاوتريخوالي هڅه وکړه.
د پښتون ژغورنې غورځنګ مشر منظور پښتين د يکشنبې په ورځ (د چنګاښ ۳۱مه) پر خپله اېکس پاڼه د المان په فرانکفورټ ښار کې د لاريون تاوتريخوالي ته په اشارې ليکلي: « ځينو روزل شويو کسان د يوه پلان له مخې تاوتريخوالی جوړ کړ او له دې لارې غواړي د سوله ييزو حرکتونو په وړاندې منفي تبلغات وکړي.»
نوموړي په لاريون کې د هغو کسانو په وړاندي د اقدام غوښتنه کړې، چې تاوتريخوالي يې رامنځته کړی.
یو شمېر افغانانو د شنبې په ورځ (د جولای ۳۰مه) په فرانکفورت کې د پاکستان کونسلګرۍ مخې ته د ګیله من وزیر د وژل کېدو او بنو پرلت کوونکو د برید په غبرګون لاریون وکړ.
دغه لاريون، چې پښتون ژغورنې غورځنګ د جرمني څانګې جوړ کړی و، پر مهال يې د دې غورځنګ مشر پښتين هم په انلاين ډول ګډونوالو ته وينا وکړه.
لاریون والو د المان په فرانکفورت ښار کې د پاکستان کونسلګرۍ مخې ته د «پښتون وژنه بس کړئ»، «لر او بر یو افغان»، «مرګ پر پاکستان»، «ترهګر- ترهګر پاکستان - پاکستان» او «د ترهګرۍ تر شا د پاکستان د پوځ لاس دی» شعارونه ورکول.
د لاریون په ترڅ کې لاریون والو د پاکستان پر کونسلګرۍ برید وکړ، د پاکستان بیرغ یې نسکور او د ودانۍ ښیښې یې په تیږو ماتې کړې.
له دې پېښې وروسته د پاکستان د بهرنیو چارو وزارت په فرانکفورټ کې د دې هېواد پر کونسلګرۍ د لاریونوالو برید او د ډېپلوماټیکو ځایونو د امنیت د خوندیتوب په برخه کې د جرمني د چارواکو ناکامي وغندله.
دغه وزارت وویل، چې د کونسلګرۍ امنیت نقض شوی دی او د کارکوونکو ژوند یې له ګواښ سره مخ شوی دی.
